আৰক্ষীৰ প্ৰশংসনীয় কাৰ্য! শিৱসাগৰ আৰক্ষীৰ উদ্যোগত অনুষ্ঠিত হ’ল কেৰিয়াৰ সজাগতা অনুষ্ঠান
শিৱসাগৰ আৰক্ষীৰ উদ্যোগত সোমবাৰে এক কেৰিয়াৰ সজাগতা অনুষ্ঠান সম্পন্ন হৈ যায়। অনুষ্ঠানত মুখ্য অতিথি হিচাপে অংশ গ্ৰহণ কৰে ৰাজ্যখনৰ আৰক্ষী সঞ্চালক প্ৰধান ভাস্কৰজ্যোতি মহন্তই।
শিৱসাগৰৰ ONGC প্ৰেক্ষাগৃহত প্ৰায় দুই শতাধিক শিক্ষাৰ্থীয়ে অংশগ্ৰহণ কৰে এই সজাগতা অনুষ্ঠানত।
শিৱসাগৰ আৰক্ষীৰ ইতিবাচক উদ্যোগ হিচাপে চৰ্চিত কেৰিয়াৰ সজাগতামূলক অনুষ্ঠানটোত পৰীক্ষাত ভাল ফলাফল কৰিব নোৱাৰা তথা তৃতীয় বিভাগত উত্তীৰ্ণ ছাত্ৰ-ছাত্ৰী সকলৰ মাজত কেৰিয়াৰ সজাগতা সৃষ্টিৰ প্ৰয়াস কৰা হয়।
সভাত শিৱসাগৰ জিলাৰ উপায়ুক্ত মেঘনিধি দাহাল, আৰক্ষী অধীক্ষক শুভ্ৰজিৎ বৰা আৰু চৰাইদেউ জিলাৰ আৰক্ষী অধীক্ষক যুৱৰাজে অংশগ্ৰহণ কৰে।
সজাগতা সভাত অংশ গ্ৰহণ কৰি আৰক্ষী সঞ্চালক প্ৰধান ভাস্কৰজ্যোতি মহন্তই কয় যে ‘সৰুতে মই গাধা আছিলো, আৰম্ভণিতে পঢ়াত মইও বেয়া আছিলো’।
ছাত্ৰ-ছাত্ৰী সকলক উৎসাহিত কৰি ডিজিপি মহন্তই কয় যে এটা পৰীক্ষাত বেয়া ফলাফলে জীৱনটো শেষ কৰিব নোৱাৰে। জীৱনটো আৰম্ভহে হৈছে, ভাবিব লগা একো নাই ।
মহন্তই লগতে কয়, ‘’কম নম্বৰ পোৱা ছাত্ৰ-ছাত্ৰী সকলক সমাজে কম গুৰুত্ব দিয়া সমাজখনো অলপ গণ্ডগুলীয়া। আচলতে নম্বৰ নহয়, সমাজৰ বাবে কিবা কৰিছেনে, মানৱ সমাজৰ বাবে কিবা কৰিছে নে সেয়া গুৰুত্ব দিব লাগে।কিন্তু সমাজে নুসুধে।‘’
আনহাতে, ছাত্ৰ-ছাত্ৰী সকলক উদ্দেশ্যি সঞ্চালক প্ৰধান গৰাকীয়ে কয়, ‘’হতাশ হব নালাগে ,বেঙা হব নালাগে, নতুন কথা শিকিবলৈ লাজ কৰিব নালাগে।‘’
ছাত্ৰ -ছাত্ৰী সকলক নিজৰ সামৰ্থৰে নিজৰ ভৰিত সমাজে গ্ৰহন কৰা পন্থাৰে নিজক প্ৰতিষ্ঠা কৰিবলৈ আহ্বান জনায় ডিজিপি মহন্তই।
প্ৰসংগক্ৰমে সঞ্চালক প্ৰধানগৰাকীয়ে কয় যে ফুটবল খেলিলেই নহ’ব, ভালকৈ খেলিব লাগিব। ৰাজ্যৰ ভিতৰত স্থান লাভ কৰিব পৰাকৈ খেলিব লাগিব।
অনুষ্ঠানটোত অসম চৰকাৰৰ দক্ষতা আৰু উদ্যমিতা বিভাগৰ দুই বিষয়া পিংকু চৌধুৰী আৰু আক্কাচ আলীয়ে সমল ব্যক্তি হিচাপে অংশ লৈ ছাত্ৰ-ছাত্ৰী সকলক কেৰিয়াৰ সম্পৰ্কত সহযোগিতা আগবঢ়ায়।