শিৱসাগৰ গ্ৰাম্য সাংবাদিক সংস্থাৰ ব্যতিক্ৰমী প্ৰয়াস; ঘৰে ঘৰে গৈ বিশিষ্ট ব‍্যক্তিক জনালে বিহুৰ ওলগ

পহিলা বহাগৰ দিনটোত শিৱসাগৰ গ্ৰাম্য সাংবাদিক সংস্থাই ল’লে এক ব্যতিক্ৰমী পদক্ষেপ। জিলাখনৰ দিচাংমুখ, বানমুখ আৰু জাঁজী অঞ্চলৰ তিনিগৰাকী বিশিষ্ট ব্যক্তিৰ ঘৰত সংস্থাৰ বিষয় ববীয়া সকল উপস্থিত হৈ ৰঙালী বিহুৰ শুভেচ্ছা প্ৰদান কৰাৰ লগতে সম্বৰ্ধনা জনায়।

দিচাংমুখ অঞ্চলৰ বিশিষ্ট কবি তথা নিবন্ধকাৰ অনিল পাংগিং,  বানমুখ কাথপাৰ গাঁৱৰ বিশিষ্ট সমাজসেৱীকা তথা প্ৰধান শিক্ষয়িত্ৰী নিকুঞ্জ শইকীয়াৰ লগতে আমগুৰিৰ জাঁজী জামুগুৰী নিবাসী তথা লোক সংস্কৃতিৰ গৱেষক ড° কৃষ্ণকান্ত সন্দিকৈক এখনি ফুলাম গামোছাৰে সম্বৰ্ধনা জনোৱাৰ লগতে বিহুৰ শুভেচ্ছা জ্ঞাপন কৰে।

গ্ৰাম্য সাংবাদিক সংস্থাই লোৱা এই পদক্ষেপক নেতৃত্ব দিয়ে সংস্থাৰ জিলা সভাপতি ৰজনীকান্ত পাংগিং, উপ-সভাপতি অৰুণ ঠাকুৰ, প্ৰসেনজিৎ গগৈ, সম্পাদক মনোৰঞ্জন হাজৰিকা, সহকাৰী সম্পাদক কল‍্যানজ‍্যোতি বুঢ়াগোহাঁই আৰু সমীৰণ দুৱাৰাই।