লকডাউনৰ কাৰণে ভাৰতত ৪৮ শতাংশলৈ হ্ৰাস পালে স্মাৰ্ট ফোনৰ বিক্ৰী

ক’ৰ’না ভাইৰাছে অন্যান্য উদ্যোগৰ লগতে মোবাইল ফোন উদ্যোগকো বেয়াকৈ ক্ষতিগ্ৰস্ত কৰিছে। ক’ৰ’না প্ৰতিৰোধৰ বাবে দিয়া লকডাউনৰ সময়ত ব্যাপক হাৰত কমিছে স্মাৰ্টফোনৰ বিক্ৰী।

ৰিচাৰ্ছ ফৰ্ম কেনালিছে কৰা এটা সমীক্ষাত এই কথা প্ৰকাশ পায়।

ৰিপ’ৰ্ট অনুসৰি জুনলৈকে স্মাৰ্টফোনৰ বিক্ৰী ৪৮ শতাংশলৈ হ্ৰাস পাইছে।

কেনালিছ ৰিপ’ৰ্টে কয় যে লকডাউনৰ কাৰণে স্মাৰ্টফোন বিক্ৰীকাৰী সকল বিভিন্ন সমস্যাৰ সন্মুখীন হৈছিল। এই সময়ছোৱাত স্মাৰ্টফোনৰ উৎপাদন কম হোৱাৰ লগতে অনলাইন আৰু অফলাইন বিক্ৰীতো নিষেধাজ্ঞা আছিল।

কেনালিছৰ বিশেষজ্ঞ মধুমিতা চৌধুৰীয়ে কয় যে ভাৰতত স্মাৰ্ট ফোনৰ বজাৰখন সুস্থিৰ হৈ উঠিবলৈ এতিয়াও বহুত সময় বাকী আছে।

উল্লেখ্য যে, লকডাউনৰ বাবে কোম্পানিসমূহে কম পৰিমানৰ কৰ্মচাৰিৰে স্মাৰ্ট ফোন উৎপাদন কৰিছে, যাৰ প্ৰত্যক্ষ প্ৰভাৱ বিক্ৰীৰ ওপৰত পৰিছে।

ইফালে স্মাৰ্টফোন ইণ্ডাষ্ট্ৰিৰ বিষয়ে জ্ঞান থকা বহু লোকে কৈছে যে লকডাউনৰ বাবে বহু লোকে চাকৰি হেৰুৱাইছে নাইবা দৰমহা কাটিছে, যাৰ বাবে স্মাৰ্ট ফোনৰ বিক্ৰী হ্ৰাস পাইছে।