চেপ্তেম্বৰ-অক্টোবৰ মাহৰ ভিতৰত দেশৰ ক্ৰীড়া প্ৰতিযোগিতা সমূহ পুনৰ আৰম্ভ হ’ব!

দেশত চেপ্তেম্বৰ আৰু অক্টোবৰ মাহৰ ভিতৰত ক্ৰীড়াৰ প্ৰতিযোগিতা সমূহ আৰম্ভ হ’ব বুলি আশা ব্যক্ত কৰিছে কেন্দ্ৰীয় ক্ৰীড়া মন্ত্ৰী কিৰেণ ৰিজিজুই।

অলপতে কেন্দ্ৰীয় ক্ৰীড়া মন্ত্ৰী গৰাকীয়ে কমনৱেল্থ দেশৰ প্ৰতিনিধি সকলৰ সৈতে এখন বৈঠকত অংশগ্ৰহণ কৰি ক’ৰ’না মহামাৰীৰ সংক্ৰমণৰ সময়ত ভাৰতে কেনেদৰে পুনৰ ক্ৰীড়া প্ৰতিযোগিতাসমূহ আৰম্ভ কৰিব সেই সম্পৰ্কে মত ব্যক্ত কৰে।

”কমনৱেল্থ দেশৰ প্ৰতিনিধি হিচাপে এই মহামাৰীৰ সময়ত সকলোৱে বিষয়বোৰৰ ওপৰত সহমত প্ৰকাশ কৰি একেলগে আগুৱাই যোৱাৰ কথা দোহাৰিছে,” ৰিজিজুৱে কয়।

ক’ৰ’না মহামাৰীৰ সংক্ৰমণৰ সময়ত অধিকাংশ দেশৰ মন্ত্ৰী সকলে উল্লেখ কৰা সমস্যা আৰু বিষয়বোৰ ভাৰতৰ সৈতে প্ৰায় একে বুলিও কেন্দ্ৰী মন্ত্ৰী গৰাকীয়ে জানিবলৈ দিয়ে।

ৰিজিজুই ভাৰত চৰকাৰে দ্বিতীয় পৰ্যায়ৰ ল’কডাউনৰ সময়ত বিশেষ নীতি-নিৰ্দেশনাৰ মাজেৰে কিছুসংখ্যক ক্ৰীড়া কাৰ্য্যক্ৰম অনুষ্ঠিত কৰাৰ বাবে অনুমতি দিছে বুলিও লগতে মত প্ৰকাশ কৰে।

ক্ৰীড়া প্ৰতিযোগিতা সমূহ অনুষ্ঠিত কৰাৰ সময়ত কঠোৰভাৱে সকলো চৰকাৰী স্বাস্থ্য বিভাগৰ নীতি-নিৰ্দেশনা পালন কৰিব লাগিব বুলিও ৰিজিজুই লগতে কয়।