দল এৰিব খোজা মেছীয়ে পুনৰ বাৰ্চিলোনাৰ হৈ আৰম্ভ কৰিলে অনুশীলন

বিশ্বৰ ষ্টাৰ ফুটবলাৰ লিঅ’নেল মেছীয়ে ক্লাব এৰিম বুলি ইচ্ছা ব্যক্ত কৰাৰ দুসপ্তাহ পিছত সোমবাৰে পুনৰ বাৰ্চিলোনা ফুটবল ক্লাবৰ সৈতে অনুশীলনত ভাগ লয়।

নিজৰ সিদ্ধান্ত সলনি কৰি পুনৰ বাৰ্চিলোনাতে থকাৰ কথা প্ৰকাশ কৰা মেছীয়ে আগন্তুক ছিজনৰ বাবে অনুশীলন আৰম্ভ কৰিছে।

৩৩ বছৰীয়া মেছীয়ে অনুশীলন চলোৱা সময়ত সতীৰ্থ খেলুৱৈৰ পৰা দূৰত থকা দেখা গৈছিল। কিয়নো মেছীৰ দ্বিতীয়টো ক’ৰ’না টেষ্ট বাকী আছে আৰু ইয়াৰ পিছতহে দলৰ সৈতে যোগ দিব পাৰিব।

উল্লেখ্য যে মেছীয়ে যোৱা সপ্তাহত উল্লেখ কৰিছিলে যে তেওঁ বাৰ্চিলোনাত থাকি সন্তুষ্ট নহয়, কিন্তু আইনৰ কিছু মেৰপেচৰ বাবে তেওঁ আগন্তুক ছিজনৰ বাবেও থাকিবলৈ বাধ্য হয়।

ইফালে ক্লাবে কয় যে যি ইয়মৰ আধাৰত মেছীয়ে দল এৰিব খুজিছিল তাৰ ম্যাদ কেতিয়াবাই উকলিছিল সেয়ে তেওঁ ক্লাব এৰাৰ বাবে অতি কমেও ২০২১ চনৰ জুন মাহলৈ অপেক্ষা কৰিব লাগিব।

মেছীয়ে যোৱা শুকুৰবাৰে ঘোষণা কৰি কৈছিল যে তেওঁ আগন্তুক ছিজন বাৰ্চিলোনাৰ হৈ খেলিব।