একাপ কফি খাই লওক, দম্পতিক কিয় এইদৰে ক’লে উচ্চতম ন্যায়ালয়ে?

আদালতত বিবাহ বিচ্ছেদৰ গোচৰ প্ৰায়েই চলি থাকে। বহু সম্পৰ্কৰ তাতেই বহু সময়ত শেষ হৈ যায়। কিন্তু দেশৰ সৰ্বোচ্চ ন্যায়ালয়ে সম্পৰ্ক এটা মেৰামতিৰ ক্ষেত্ৰত এক অভিনৱ উপায়ৰ পৰামৰ্শ আগবঢ়ায়।

সোমবাৰে উচ্চতম ন্যায়ালয়ত এটা বিবাহ বিচ্ছেদৰ গোচৰ উঠিছিল। তাতেই স্বামী-স্ত্ৰীক কফি শ্বপলৈ গৈ তেওঁলোকৰ বিবাদ নিষ্পত্তি কৰিবলৈ কোৱা হয়। তেওঁলোকৰ এটা তিনি বছৰীয়া সন্তানো আছিল।

আদালতে দুয়োকে কয়, “আপোনালোকৰ এটা তিনি বছৰীয়া সন্তান আছে।  দুয়োৰে মাজত ইমান ইগো থকা উচিত নহয়। আমাৰ এখন ভাল কেন্টিন আছে। সেইটো যথেষ্ট ভাল। তাত এটা সুকীয়া ঠাই বনাই লওক। আজি ৰাতি দুজনে তাত ৰাতিৰ আহাৰ গ্ৰহণ কৰক। হয়তো একাপ কফিতেই সকলো সমস্যা সমাধান হ’ব পাৰে।”

অতীতৰ সকলো তিক্ত অভিজ্ঞতা পাহৰি যাবলৈ কয় উচ্চতম ন্যায়ালয়ে। তেওঁলোকক এতিয়া নিজৰ ভৱিষ্যতৰ কথা চিন্তা কৰিবলৈ কোৱা হয়। আদালতে কয় যে জীৱনত ইতিবাচক চিন্তাহে প্ৰাধান্য পাব লাগে, নেতিবাচক চিন্তাই নহয়।

দেশৰ সৰ্বোচ্চ ন্যায়ালয়ৰ এই চিন্তাধাৰা দেখি সকলোৱে আচৰিত হয়। তেনে এটা মন্তব্যই সকলোৰে দৃষ্টি আকৰ্ষণ কৰিছে য’ত স্বামী-স্ত্ৰী দুয়োজনেই বিবাহ বিচ্ছেদৰ বাবে আদালতলৈ গৈছিল।