১৭ মাহৰ পাছত জেলৰ পৰা মুকলি; মনীষ ছিছ’দিয়াৰ জামিন মঞ্জুৰ কৰিলে উচ্চতম ন্যায়ালয়ে

অৱশেষত উচ্চতম ন্যায়ালয়ে মনীষ চিছ’দিয়াৰ জামিন মঞ্জুৰ কৰিছে। শুকুৰবাৰে উচ্চতম ন্যায়ালয়ে আবকাৰী দুৰ্নীতিৰ গোচৰত আপৰ নেতা মনীষ ছিছ’দিয়াৰ জামিন মঞ্জুৰ কৰে।

আবকাৰী নীতিৰ গোচৰত ১৭ মাহ কাৰাবন্দী হৈ জামিন লাভ কৰিলে দিল্লীৰ প্ৰাক্তন উপ-মুখ্যমন্ত্ৰী মনীষ ছিছ’দিয়াই। উচ্চতম ন্যায়ালয়ে মনীষ ছিছ’দিয়াৰ জামিন মঞ্জুৰ কৰে। তিনিদিন পূৰ্বে ৬ আগষ্টত ন্যায়াধীশ বি আৰ গাভাই আৰু ন্যায়াধীশ কে ভি বিশ্বনাথৰ বিচাৰপীঠে এই সন্দৰ্ভত নিৰ্দেশ সংৰক্ষিত কৰিছিল।

দিল্লী উচ্চ ন্যায়ালয়ৰ ৰায়ৰ বিৰুদ্ধে উচ্চতম ন্যায়ালয়ৰ কাষ চাপিছিল মনীষ ছিছ’দিয়াই। দৰাচলতে উচ্চ ন্যায়ালয়ে চিছ’দিয়াৰ জামিন আবেদন নাকচ কৰিছিল।

আম আদমী পাৰ্টিৰ নেতাগৰাকী প্ৰায় ১৭ মাহ ধৰি কাৰাগাৰত বন্দী হৈ আছে। যোৱা বছৰৰ ২৬ ফেব্ৰুৱাৰীত চিবিআইয়ে দুৰ্নীতি প্ৰতিৰোধ আইনৰ অধীনত ছিছ’ডিয়াক গ্ৰেপ্তাৰ কৰাৰ বিপৰীতে বলবৎকাৰী সঞ্চালকালয়ে (ইডি) একে বছৰৰ ৯ মাৰ্চত ধন সৰবৰাহৰ প্ৰতিৰোধ আইন (পিএমএলএ)ৰ অধীনত গ্ৰেপ্তাৰ কৰিছিল।

লগতে পঢ়কঃ উচ্চতম ন্যায়ালয়ত প্ৰদৰ্শিত হ’ব আমিৰ খান প্ৰযোজিত ছবি; চাবলৈ আহিব খোদ মুখ্য ন্যায়াধীশ

উচ্চতম ন্যায়ালয়ে আপ নেতা মনীষ চিছ’দিয়াক জামিন প্ৰদান সন্দৰ্ভত চিছ’দিয়াৰ অধিবক্তা ঋষিকেশ কুমাৰে কয়, ‘চিবিআই আৰু ইডি দুয়োটা গোচৰতে উচ্চতম ন্যায়ালয়ে মনীষ ছিছ’দিয়াক জামিন প্ৰদান কৰিছে। যোৱা ১৭ মাহ ধৰি তেওঁ জেলত আছিল। মনীষ ছিছ’দিয়াৰ হৈ বিচাৰ প্ৰক্ৰিয়াত কোনো পলম হোৱা নাই বুলিও উচ্চতম ন্যায়ালয়ে কয় আৰু লগতে কয় যে জামিন বিচৰা সকলো গোচৰ যাতে উচ্চতম ন্যায়ালয়ত নাহে তাৰ বাবে নিম্ন আদালত আৰু উচ্চ ন্যায়ালয়ে নিশ্চিত কৰিব লাগে। উচ্চতম ন্যায়ালয়ে ‘জামিন নিয়ম, জেল ব্যতিক্ৰম’ৰ মূল নীতি বন্ধ কৰি ৰাখিছে। এইমাত্ৰ নিৰ্দেশ আহিল আৰু আমি নিম্ন আদালতত চৰ্ত পূৰণ কৰাৰ লগে লগে মনীষ চিছ’দিয়াক মুকলি কৰি দিয়া হ’ব।”