বিহাৰ নিৰ্বাচনৰ পূৰ্বে ভোটাৰ তালিকা পুনৰীক্ষণ: আধাৰ কাৰ্ড-ভোটাৰ কাৰ্ডৰ গ্ৰহণযোগ্যতাৰ বিষয়ে উচ্চতম ন্যায়ালয়ত শুনানি গ্ৰহণ

শেহতীয়াকৈ বিহাৰৰ ভোটাৰ তালিকাৰ বিশেষ আৰু ব্যাপক পুনৰীক্ষণ (SIR)ৰ ক্ষেত্ৰত উচ্চতম ন্যায়ালয়ে নিৰ্বাচন আয়োগক আধাৰ কাৰ্ড আৰু ভোটাৰ কাৰ্ডক পৰিচয় পত্ৰ হিচাপে বিবেচনা কৰিবলৈ পৰামৰ্শ দিছে। আয়োগে এছ আই আৰত বিবেচনা কৰিবলগীয়া নথি-পত্ৰৰ তালিকা প্ৰকাশ কৰিছিল। য’ত আধাৰ কাৰ্ড বা ভোটাৰ কাৰ্ডৰ দৰে কোনো নথি-পত্ৰৰ উল্লেখ নাই।

সোমবাৰে উচ্চতম ন্যায়ালয়ৰ ন্যায়াধীশ সূৰ্যকান্ত আৰু ন্যায়াধীশ জয়মল্য বাগচীৰ বিচাৰপীঠে শুনানি গ্ৰহণ কৰে। ন্যায়াধীশসকলে এই দুয়োটা নথি বিবেচনাধীন তালিকাত অন্তৰ্ভুক্ত কৰিবলৈ পৰামৰ্শ দিছে। অৱশ্যে এই সন্দৰ্ভত এতিয়ালৈকে কোনো নিৰ্দেশ দিয়া হোৱা নাই। এই সন্দৰ্ভত মঙলবাৰে পুনৰ শুনানি গ্ৰহণ কৰিব উচ্চতম ন্যায়ালয়ে।

নিৰ্বাচন আয়োগৰ তথ্য অনুসৰি বিহাৰৰ নিৰ্বাচনৰ পূৰ্বে ভোটাৰ তালিকাৰ এই পুনৰীক্ষণ প্ৰয়োজনীয়। জনসংখ্যা পৰিৱৰ্তন আৰু নাগৰিকৰ প্ৰব্ৰজনৰ বাবে ইয়াৰ গুৰুত্ব বৃদ্ধি পাইছে। বিহাৰৰ এই তালিকাখন বিগত ২০ বছৰে সম্পূৰ্ণ সংশোধন হোৱা নাই। আধাৰ বা ৰেচন কাৰ্ডৰ সন্দৰ্ভত আয়োগে কয় যে এই নথিসমূহ ভোটাৰ পৰীক্ষণৰ বাবে গ্ৰহণ কৰিব নোৱাৰিব। কাৰণ সেইবোৰ সহজে জাল কৰিব পৰা যায়। আয়োগৰ হৈ অধিবক্তা ৰাকেশ দ্বিবেদীয়ে ভোটাৰ কাৰ্ড, আধাৰ কাৰ্ড আৰু ৰেচন কাৰ্ডৰ কেইবাটাও সীমাবদ্ধতাৰ ওপৰত আলোকপাত কৰে। অৱশ্যে ইয়াৰ বিৰোধিতা কৰে আদালতে।

ইফালে আয়োগৰ অধিবক্তাই কয় যে আধাৰ কাৰ্ড গ্ৰহণ কৰা হৈছে। কিন্তু তেওঁলোকৰ লগত আন নথি-পত্ৰও লোৱা হৈছে। এই খচৰা তালিকাখনক যিকোনো সময়তে প্ৰত্যাহ্বান জনাব পাৰি। অৱশ্যে তেওঁলোকেও যিকোনো সময়তে তালিকা বাতিল কৰিব পাৰে বুলি আদালতে জানিবলৈ দিয়ে।

আৱেদনকাৰীয়ে ভোটাৰ তালিকা চূড়ান্ত কৰাত বাধাপ্ৰাদান কৰাৰ বাবে আবেদন দাখিল কৰিছিল। কিন্তু আদালতে তাৎক্ষণিক ভাবে সমগ্ৰ প্ৰক্ৰিয়াটো স্থগিত ৰখাত সন্মতি প্ৰদানৰ পৰা বিৰত থাকে।