উচ্চতম ন্যায়ালয়ত CAA সংক্ৰান্তীয় গোচৰ; আজি গ্ৰহণ কৰিব ২০০ তকৈও অধিক আৱেদনৰ শুনানি

দেৱালীৰ বন্ধৰ পিছত আজি খুলিব উচ্চতম ন্যায়ালয়। অক্টোবৰৰ অন্তিম দিনটোত আজি উচ্চতম ন্যায়ালয়ে CAA সম্পৰ্কীয় ২৩২ টা গোচৰৰ শুনানি গ্ৰহণ কৰিব।

ইয়াৰ পূৰ্বে অহা ৮ নৱেম্বৰত কাৰ্যকাল শেষ হ’বলগীয়া মুখ্য ন্যায়াধীশ উদয় উমেশ ললিতে কৈছিল যে কা সম্পৰ্কীয় সকলো আৱেদনৰ শুনানি তিনিজনীয়া বিচাৰপীঠে গ্ৰহণ কৰিব।

উল্লেখ্য যে ১৯৫৫ চনত অবৈধ প্ৰব্ৰজন প্ৰতিৰোধ কৰিবলৈ দেশত নাগৰিকত্ব আইন প্ৰণয়ন কৰা হৈছিল। ৬৪ বছৰৰ পিছত অবৈধ অনুপ্ৰৱেশকাৰীৰ সংজ্ঞা সলনি কৰিবলৈ আইনখন সংশোধন কৰা হয়। ১৯৫৫ চনৰ আইনৰ ধাৰা ২ ত এজন অবৈধ অনুপ্ৰৱেশকাৰীক সংজ্ঞায়িত কৰা হৈছিল।

লগতে পঢ়ক: Gujarat Bridge Collapse: ছট পূজাত গুজৰাটত দলং খহি পৰি ভয়ংকৰ দুৰ্ঘটনা; মৃত্যুৰ সংখ্যা ৯১ লৈ বৃদ্ধি

২০১৯ ৰ সংশোধনীত ধাৰা ২ সংশোধন কৰি ২(১)বি যোগ কৰা হয়। সেই অনুসৰি, বাংলাদেশ, পাকিস্তান আৰু আফগানিস্তানৰ পৰা অহা হিন্দু, শিখ, বৌদ্ধ, জৈন, পাৰ্চী আৰু খ্ৰীষ্টানসকলক অবৈধ অনুপ্ৰৱেশকাৰীৰ শ্ৰেণীত অন্তৰ্ভুক্ত কৰা নহ’ব। ২০১৪-ৰ ৩১ ডিচেম্বৰৰ আগতে সেই দেশবোৰৰ পৰা অহা ছয়টা ধৰ্মীয় গোটৰ লোকসকলে ভাৰতীয় নাগৰিকত্বৰ বাবে আবেদন কৰিব পাৰে।

আৰম্ভণিৰ পৰাই CAAক লৈ বিতৰ্কৰ অন্ত পৰা নাই। কেন্দ্ৰীয় চৰকাৰে এই সংশোধনী অনাৰ লগে লগে দেশত প্ৰবল বিক্ষোভৰ সৃষ্টি হয়। আৰম্ভণিৰ পৰাই সকলো বিৰোধী দলে ইয়াৰ বিৰোধিতা কৰি আহিছে। আইনখন বাতিল কৰাৰ দাবীও উঠিছে।

লগতে পঢ়ক: World’s longest passenger train: ১০০ টা ডবাৰে চলিল প্ৰায় ২ কিলোমিটাৰ দীঘল বিশ্বৰ দৈৰ্ঘ্যতম যাত্ৰীবাহী ৰে’লখন!

ইপিনে, কেন্দ্ৰই কৈছে যে এই আইন কাৰো নাগৰিকত্ব কাঢ়ি লোৱাৰ বাবে নহয়, কিন্তু নাগৰিকত্ব দিয়াৰ বাবেহে। কিন্তু বিৰোধীক বাধা দিব পৰা নাই। আইনখন কাৰ্যকৰী কৰিবলৈ গ’লেই বিৰোধীয়ে পুনৰ ইয়াৰ বিৰুদ্ধে ৰাজপথলৈ ওলাই আহিব বুলি স্পষ্ট হৈ আছে। তাৰমাজতে এইবাৰ উচ্চতম ন্যায়ালয়ত এই আইনৰ বিৰুদ্ধে দাখিল কৰা সকলো গোচৰৰ আজি শুনানি হ’ব।