আইছ’লেশ্যন কক্ষত নাৰ্চক অশ্লীল ইংগিত, উলংগ বিচৰণ তবলিগী জামাতত অংশ লোৱা লোকৰ
দিল্লীৰ নিজামুদ্দিনস্থিত তবলিগী জামাতৰ মাৰ্কাজত অংশ লোৱা লোকসকলৰ শৰীৰত ক’ৰ’না ভাইৰাছৰ লক্ষণ দেখা ঘটনাই আতংকিত কৰি তুলিছে দেশবাসীক।
এই খবৰ বিয়পি পৰাৰ লগে লগে দেশৰ প্ৰতিখন ৰাজ্যই অধিক সতৰ্ক হোৱা পৰিলক্ষিত হৈছে কিয়নো জামাতত প্ৰতিখন ৰাজ্যৰ লোকেই অংশ গ্ৰহণ কৰিছিল।
উত্তৰ প্ৰদেশতো জামাতত অংশ লোৱা লোকক চিনাক্ত কৰি কিছু সংখ্যকক আইছ’লেশ্যনত ৰখা হৈছে আৰু কিছু সংখ্যকক ৰখা হৈছে কোৱাৰেণ্টাইনত।
ৰাজ্যখনৰ গাজিয়াবাদৰ এখন চিকিৎসালয়তো জামাতত অংশ লোৱা কিছু সংখ্যক লোকক আইছ’লেশ্যন ৱাৰ্ডত ভৰ্তি কৰা হৈছে। কিন্তু এই লোকসকলৰ আচৰণে স্তম্ভিত কৰিছে চিকিৎসালয়ৰ কৰ্মচাৰীসকলক।
ইতিমধ্যে এই লোকসকলৰ বিৰুদ্ধে থানাত অভিযোগ দাখিল কৰা হৈছে।
জানিব পৰা মতে আইছ’লেশ্যনত থকা লোক কেইজনে উলংগ হৈ ৱাৰ্ডত ঘূৰি ফুৰা বুলি গাজিয়াবাদৰ জিলা চৰকাৰী চিকিৎসালয়ৰ মুখ্য চিকিৎসা অধীক্ষকে এখন পত্ৰৰ জৰিয়তে অভিযোগ কৰে।
উলংগ হৈ অভব্য আচৰণ কৰা, স্বাস্থ্য কৰ্মীক সহায় নকৰা আদি সম্বন্ধত লোক কেইজনৰ বিৰুদ্ধে গাজিয়াবাদৰ কোতবালি থানাত ভাৰতীয় দণ্ডবিধিৰ ৩৫৪, ২৯৪, ৫০৯, ২৬৯, ২৭০ আৰু ২৭১ ধাৰাৰ অধীনত ২৮৮/২০ নম্বৰত গোচৰ ৰুজু কৰে।
অভিযোগ দাখিল কৰা পত্ৰত উল্লেখ কৰা অনুসৰি আইছ’লেশ্যনত থকা লোক কেইজনে নাৰ্চৰ সন্মুখত অশ্লিল গান শুনে আৰু অশ্লিল ইংগিতো প্ৰদান কৰে। তদুপৰি লোক কেইজনে চিকিৎসক আৰু নাৰ্চক বিড়ি আৰু চিগাৰেট খুজিও আমনি দিয়ে বুলি পত্ৰখনত উল্লেখ কৰে।
উল্লেখ্য যে এই লোকসকলৰ বিৰুদ্ধে চিকিৎসালয়খনৰ কিছু নাৰ্চে মুখ্য চিকিৎসা অধীক্ষকৰ আগত অভিযোগ দাখিল কৰিছিল।