টেলিভিচনত মহিলাৰ অংশগ্ৰহণৰ ক্ষেত্ৰত কঠোৰ আইন বলৱৎ তালিবানৰ

আশংকা কৰাৰ দৰে আফগানিস্তানত তালিবানে বলৱৎ কৰিছে কঠোৰ নাৰী বিদ্বেষী আইন।যোৱা আগষ্টত ক্ষমতা দখলৰ পিছতে তালিবানে বলৱৎ কৰিছে টেলিভিশ্যন চেলেন সম্পৰ্কীয় নতুন নীতি নিৰ্দেশনা। যি আইনত নাৰীৰ বিৰুদ্ধে অত্যন্ত কঠোৰ নীতি নিৰ্দেশনা জাৰী কৰিছে তালিবান প্ৰশাসনে।

আন্তৰাষ্ট্ৰীয় সংবাদ সংস্থা বিবিচিত প্ৰকাশিত বাতৰি মতে তালিবানে টেলিভিশ্যন চেনেলসমূহৰ বাবে মুঠ আঠটা নতুন নীতি নিৰ্দেশনা জাৰি কৰিছে।

এই নিৰ্দেশনা অনুসৰি নিউজ চেনেলৰ মহিলা বাতৰি পৰিৱেশকে মূৰত হেডস্কাৰ্ফ পৰিধান কৰাতো বাধ্যতামূলক হ’ব।

ইফালে শ্বৰীয়া বা ইছলামিক আইন আৰু আফগান মূল্যবোধৰ নীতি বিৰোধী চিনেমা সম্প্ৰচাৰ নিষিদ্ধ কৰা হৈছে। নাৰীক অভিনয় কৰা বাধাৰ দিয়াৰ লগতে পুৰুষৰ শৰীৰৰ স্পৰ্শকাতৰ অংগসমূহৰ প্ৰদৰ্শনতো কঠোৰ নিষেধাজ্ঞা জাৰি কৰা হৈছে।

কৌতুক বা মনোৰঞ্জনৰ মাধ্যমেৰে আফগান মূল্যবোধ বা ধৰ্মক অপমান কৰাৰ যিকোনো দৃশ্য-শ্ৰাব্য মাধ্যমকে নিষিদ্ধ কৰিছে তালিবানে।

বিদেশী সংস্কৃতি বা মূল্যবোধ প্ৰচাৰ কৰা যিকোনো বিদেশী চলচ্চিত্ৰকে আফগানিস্তানৰ ভিতৰত সম্প্ৰচাৰ কৰাত বাধা আৰোপ কৰিছে তালিবান প্ৰশাসনে।

তালিবানে বলৱৎ কৰা এই আইনৰ ফলত আফগানিস্তানৰ টেলিভিশ্যন উদ্যোগতটো সংকটত পৰিব বুলি আশংকা কৰা হৈছে।

আফগানিস্তানৰ টেলিভিশ্যন চেনেলসমূহত বিদেশী কাহিনীৰে নিৰ্মিত ধাৰাবাহিক আদি সম্প্ৰচাৰ কৰা হয় য’ত মহিলাই মুখ্য চৰিত্ৰত অভিনয় কৰে।

তালিবানৰ নতুন আইন বলৱৎ হোৱাৰ লগে লগে চেলেনবোৰে এইসমূহৰ সম্প্ৰচাৰ কৰিব নোৱাৰিব।

ইফালে এই আইন প্ৰৱৰ্তনৰ পিছতে আফগানিস্তানৰ প্ৰেছ সংগঠনসমূহে এই নতুন নিষেধাজ্ঞাক অপ্ৰত্যাশিত বুলি অভিহিত কৰিছে।

উল্লেখ্য যে ক্ষমতা দখল কৰিয়েই তালিবানে ছোৱালী তথা যুৱতীসকলক বিদ্যালয়লৈ যোৱাত নিষেধাজ্ঞা জাৰি কৰি ঘৰতে থাকিবলৈ নিৰ্দেশ দিছিল।