মোদীৰ আমোলত বৃদ্ধি নহ’ল শ্ৰমিকৰ মজুৰি- অভিযোগ কংগ্ৰেছৰ

কংগ্ৰেছে আজি অভিযোগ উত্থাপন কৰে যে নৰেন্দ্ৰ মোদীৰ কাৰ্যকালত শ্ৰমিকৰ মজুৰি অভূতপূৰ্বভাৱে হ্ৰাস হৈছে। কংগ্ৰেছৰ মুখপাত্ৰ জয়ৰাম ৰমেশে দাবী কৰে যে যদিহে কেন্দ্ৰত বিৰোধী মিত্ৰজোঁট ‘ইণ্ডিয়া’ ক্ষমতালৈ আহে তেন্তে দেশ পুনৰবাৰ শ্ৰীবৃদ্ধিৰ পথত আগবাঢ়ি যাব। মোদী চৰকাৰৰ বিভিন্ন মন্ত্ৰালয়ৰ তথ্যৰ উল্লেখ কৰি ৰমেশে দেখুৱাইছে যে আজিৰ তুলনাত ১০ বছৰ পূৰ্বে শ্ৰমিকৰ ক্ৰয় ক্ষমতা বহু বেছি আছিল।

কংগ্ৰেছকে ধৰি বিৰোধীয়ে দাবী কৰি আহিছে যে মোদীৰ কালত শ্ৰমিকৰ আৰ্থিক অৱস্থাৰ ধাৰাবাহিকভাৱে অৱনতি ঘটিছে। চৰকাৰে ক্ৰমান্বয়ে শ্ৰমিকৰ অৰ্থনৈতিক মেৰুদণ্ড ভাঙিছে। কংগ্ৰেছে আজি দাবী কৰিছে যে মজুৰি বৃদ্ধিতকৈ মূল্যবৃদ্ধিৰ হাৰ অধিক হৈছে। শ্ৰমিকৰ প্ৰকৃত মজুৰি ভয়ংকৰভাৱে হ্ৰাস পাইছে। ৰমেশে কয় যে চৰকাৰৰ লেবাৰ ব্যুৰোৰ মজুৰিৰ হাৰ সূচকাংকত কোৱা হৈছে যে ২০১৪ চনৰ পৰা ২০২৩ চনলৈকে শ্ৰমিকৰ প্ৰকৃত মজুৰি স্থবিৰ হৈ পৰিছে। ফলত মোদী চৰকাৰৰ কাৰ্যকালত শ্ৰমিকৰ প্ৰকৃত মজুৰি তীব্ৰভাৱে হ্ৰাস পাইছে।

মনমোহন সিঙৰ কাৰ্যকালত কৃষি শ্ৰমিকৰ প্ৰকৃত মজুৰি বৃদ্ধিৰ হাৰ বছৰি ৬.৮ শতাংশ বুলি দাবী কৰে ৰমেশে। কিন্তু মোদীৰ দিনত প্ৰতি বছৰে কমি আহিছে। ২০১৪ চনৰ পৰা ২০২২ চনৰ ভিতৰত চেণ্টাৰ ফৰ লেবাৰ ৰিচাৰ্চ এণ্ড একচনৰ তথ্যৰ উদ্ধৃতি দি কংগ্ৰেছৰ মুখ্য মুখপাত্ৰগৰাকীয়ে দাবী কৰে।

কংগ্ৰেছে অভিযোগ উত্থাপন কৰিছে যে মোদীৰ দিনতো বিনিয়োগৰ হাৰ হ্ৰাস পাইছে। বিবৃতিটোত কোৱা হৈছে যে বিনিয়োগৰ পৰিমাণ এনেদৰে হ্ৰাস পাইছে যিটো পূৰ্বতে কেতিয়াও হোৱা নাছিল। এই পৰিঘটনাই দেশৰ দীৰ্ঘম্যাদী বৃদ্ধিৰ প্ৰতি প্ৰত্যাহ্বানৰ সৃষ্টি কৰিছে। ইউ পি এৰ ১০ বছৰৰ শাসনকালত বিনিয়োগ আৰু জিডিপিৰ অনুপাত আছিল ৩৩.৪%। কিন্তু মোদীৰ দিনত এয়া ২৮.৭ শতাংশলৈ নামি আহিছে। মনমোহন সিঙৰ নেতৃত্বত ২০০৪ চনত প্ৰত্যক্ষ বিদেশী বিনিয়োগ জিডিপিৰ ০.৮%ৰ পৰা ১.৭%লৈ বৃদ্ধি পায়। সেয়া ২০২২ চনত ১.৫ শতাংশলৈ হ্ৰাস পাইছে। কংগ্ৰেছে লগতে দাবী কৰে যে মোদীৰ কাৰ্যকালত উৎপাদন খণ্ডৰ বৃদ্ধিৰ হাৰ ব্যাপকভাৱে হ্ৰাস পাইছে।