তামুলপুৰত উপস্থিত প্ৰথম মহিলা এভাৰেষ্ট বিজয়ী বাচেন্দ্ৰী পাল

মহিলা সৱলীকৰণ, সুস্বাস্থ্য আৰু নতুন প্ৰজন্মক নিজৰ লক্ষ্যত উপনীত হ’বলৈ উৎসাহিত কৰাৰ  লক্ষ্যৰে সোমবাৰে তামুলপুৰত উপস্থিত হয় প্ৰথম মহিলা এভাৰেষ্ট বিজয়ী, পদ্ম ভূষণ, পদ্মশ্ৰী, অৰ্জুন বঁটা প্ৰাপক বাচেন্দ্ৰী পাল ৷

দেশৰ ভিন্ন প্ৰান্তৰ আন দহ গৰাকী পঞ্চাশ উৰ্ধৰ মহিলা পৰ্ব্বতাৰোহীৰ সৈতে তামুলপুৰ কেন্দ্ৰীয় বিদ্যালয়ত উপস্থিত হোৱা বাচেন্দ্ৰী পালে বিদ্যালয়খনৰ ছাত্ৰ-ছাত্ৰী সকলৰ সৈতে মত বিনিময় কৰে৷

টাটা ষ্টিল এডভেন্সাৰ ফাউণ্ডেছনৰ এগৰাকী উচ্চ পদস্থ বিষয়া ৬৭ বছৰীয়া বাচেন্দ্ৰী পালে ছাত্ৰ-ছাত্ৰী সকল কেনেদৰে নিজৰ লক্ষ্যত উপস্থিত হ’ব লাগে তাৰ বাবে অনুপ্ৰেৰণামুলক বক্তব্য দাঙি ধৰে ৷

লগতে পঢ়ক: যোৰহাট আৰক্ষীৰ হাতত গ্ৰেপ্তাৰ দুজন বন্দুক সৰবৰাহকাৰী

উল্লেখ্য যে ফিট ইণ্ডিয়া, টাটা ষ্টিল এডভেন্সাৰ ফাউণ্ডেছনৰ বিশেষ উদ্যোগ়ত যোৱা ৮ মাৰ্চৰ বিশ্ব নাৰী দিৱসৰ দিনা অৰুণাচল প্ৰদেশৰ ৫০৫ পইণ্টৰ পৰা লাডাখৰ টাইগাৰ হিলচলৈ প্ৰায় পাঁচ হাজাৰ কিলোমিটাৰ দৈৰ্ঘৰ যাত্ৰা আৰম্ভ কৰা বাচেন্দ্ৰী পাল সহ দহ গৰাকী মহিলা পৰ্ব্বতাৰোহীয়ে তামুলপুৰ কেন্দ্ৰীয় বিদ্যালয়ত পদাৰ্পণ কৰে।

দলটোক তামুলপুৰস্থিত ভাৰতীয় সেনাৰ ১০৭ মাউণ্টেইন ব্ৰিগেডৰ উচ্চ পদস্থ সেনা বিষয়া তথা কেন্দ্ৰীয় বিদ্যালয় কৰ্তৃপক্ষই ফুলাম গামোছা, ফুলৰ থোপাৰে বিপুল আদৰণি জনায় ৷