গুৱাহাটী লোকসভা সমষ্টিত কাইলৈৰ পৰা আৰম্ভ হ’ব “অসমতো কেজৰিৱাল’ অভিযান

সমগ্ৰ দেশে বিজেপিৰ বিকল্পৰ সন্ধানত থকাৰ সময়তে আম আদমি পাটীয়ে ইণ্ডিয়া এলায়েন্সৰ হৈ অসমৰ তিনিখন লোকসভা আসনত প্ৰতিদ্বন্দিতা  আগ বঢ়াবলৈ সাজু হৈছে। 

দলটোৱে ইতিমধ্যে নিৰ্বাচনকেন্দ্ৰিক প্ৰচাৰ আৰম্ভ কৰি জনতাৰ বিপুল সঁহাৰি লাভ কৰিবলৈ সক্ষম হৈছে। নিৰ্বাচনী প্ৰচাৰৰ লগত সংগতি ৰাখি আপে অসমত প্ৰতিদ্বন্দিতা  আগ বঢ়োৱা তিনিটা সমষ্টিত ‘অসমতো কেজৰিৱাল’ শীৰ্ষক এক অভিযান আৰম্ভ কৰিব। 

কাইলৈৰ পৰা ১০ দিন চলিবলগীয়া এই অভিযানৰ বিষয়ে সদৰি কৰি আপ অসমৰ সভাপতি তথা গুৱাহাটী লোকসভা সমষ্টিৰ আপৰ প্ৰাৰ্থী ডা০ ভবেন চৌধুৰীয়ে কয় যে ৭০০০ জনীয়া এটা স্বেচ্ছাসেৱকৰ দলে সমষ্টিটোৰ প্ৰতিটো ৱাৰ্ড আৰু চুবুৰীলৈ গৈ জনসভাৰ আয়োজন কৰিব। 

কাইলৈ এই অভিযানৰ শুভাৰম্ভ মহানগৰৰ বেলতলাস্থিত বলিষ্ঠ চাৰিআলি শিশু উদ্যানত কৰা হ’ব বুলি তেওঁ জানিবলৈ দিয়ে। 

এই অভিযানৰ অংশ হিচাপে আম আদমি পাৰ্টীৰ ৰাষ্ট্ৰায় আহ্বায়ক অৰবিন্দ কেজৰিৱালৰ অসমবাসীলৈ প্ৰেৰণ কৰা পত্ৰ সম্বলিত এখন প্ৰচাৰ-পত্ৰিকাও আজি ডা০ চৌধুৰীয়ে উন্মোচন কৰে।

ডা০ ভবেন চৌধুৰীয়ে কয় যে দেশৰ বৃহৎ বৃহৎ দুৰ্নীতিত লুতুৰিপুতুৰি হৈ থকা ডাঙৰ ডাঙৰ ৰাজনৈতিক নেতাক ৰঙা দলিচা পাৰি দিয়া বিজেপিৰ পৰা যে দেশৰ উন্নতি নহয়, সেই কথা জনতাই বুজি পাই বিকল্পৰ সন্ধানত আছে। ভাৰতক বিশ্বৰ ভিতৰত ১ নম্বৰ দেশ হিচাপে গঢ়ি তোলাৰ বাবে পণ কৰা অৰবিন্দ কেজৰিৱাল আৰু আম আদমি পাৰ্টীয়েই যে একমাত্ৰ বিকল্প, জনতাই বুজি পাইছে। সেই লক্ষ্য, উদ্দেশ্য আৰু সংকল্প আগত ৰাখি আম আদমি পাৰ্টীয়ে এই নিৰ্বাচনত প্ৰতিদ্বন্দ্বিত কৰিছে।