সাধাৰণ জনতাৰ মূৰত পুনৰ মাধমাৰ মোদী চৰকাৰৰ! হাঁপানী,যক্ষ্মাকে ধৰি বহু ৰোগৰ ঔষধৰ মূল্য ৫০% পৰ্যন্ত বৃদ্ধি চৰকাৰৰ
আকৌ এবাৰ বৃদ্ধি পাইছে ঔষধৰ দাম। ৰাষ্ট্ৰীয় ঔষধ মূল্য নিৰ্ধাৰণ কৰ্তৃপক্ষই গুৰুতৰ ৰোগৰ বাবে কিছুমান ঔষধৰ মূল্য বৃদ্ধি কৰাৰ সিদ্ধান্ত গ্ৰহণ কৰিছে। ঔষধৰ দাম কমেও ৫০ শতাংশ বৃদ্ধি পাইছে। এই খবৰটো চৰ্চালৈ অহাৰ পাছত সাধাৰণ জনতাই মূৰে কপালে হাত দিছে।
হাঁপানী, টিবি, গ্ল’ক’মা আৰু মানসিক বিকাৰ আৰু থেলাছেমিয়াৰ ঔষধৰ দাম বৃদ্ধি কৰাৰ সিদ্ধান্ত লোৱা হৈছে। ৰাষ্ট্ৰীয় ঔষধ মূল্য নিৰ্ধাৰণ কৰ্তৃপক্ষই এক অধিসূচনা জাৰি কৰি স্পষ্ট কৰি দিছে যে তেওঁলোকে কিয় মূল্য বৃদ্ধিৰ সিদ্ধান্ত লৈছে। তেওঁলোকে কয় যে এই ঔষধ তৈয়াৰ কৰিবলৈ ব্যৱহাৰ কৰা কেঁচামালৰ দাম বৃদ্ধি পাইছে।
ইয়াৰ উপৰিও আন কিছুমান কাৰক আছে। মুদ্ৰাৰ বিনিময় হাৰ বৃদ্ধিৰ লগে লগে উৎপাদন ব্যয়ও বৃদ্ধি পায়। গতিকে ঔষধৰ দাম বৃদ্ধি কৰিবলৈ বাধ্য হৈছে। কেন্দ্ৰীয় চৰকাৰৰ মূল্য নিয়ন্ত্ৰকে ঔষধ নিৰ্মাতাসকলক মূল্যবৃদ্ধিৰ ক্ষেত্ৰত ৫০ শতাংশ পৰ্যন্ত ৰেহাই দিছে।
উল্লেখিত ঔষধৰ বাহিৰেও এই সিদ্ধান্তৰ বাবে এট্ৰপিন ইনজেকচন, বেনজিন পেনিচিলিন ১০ লাখ আই ইউ ইনজেকচন, লিথিয়াম টেবলেট ৩০০গ্ৰাম (মানসিক স্বাস্থ্য), ষ্ট্ৰেপ্ট’মাইচিন পাউদাৰ, ছালবুটামল টেবলেটকে ধৰি আন কেইবাবিধো ঔষধৰ মূল্য প্ৰভাৱিত হ’ব। ইয়াৰ পূৰ্বে ২০১৯ আৰু ২০২১ চনত এনেদৰে বৃদ্ধি কৰা হৈছিল ঔষধৰ দাম।
কিন্তু চলিত বৰ্ষৰ মে’ মাহত কেন্দ্ৰীয় চৰকাৰে ৪১টা সাধাৰণ ব্যৱহৃত ঔষধৰ মূল্য হ্ৰাস কৰাৰ সিদ্ধান্ত গ্ৰহণ কৰে। ডায়েবেটিছ, হৃদৰোগ, যকৃতৰ লগত জড়িত ৰোগৰ চিকিৎসাত ব্যৱহৃত ঔষধৰ মূল্য হ্ৰাস পাইছে। ইয়াৰ পূৰ্বে যোৱা এপ্ৰিল মাহৰ পৰা পেৰাচিটামলকে ধৰি কমেও ৮০০ ঔষধৰ মূল্য বৃদ্ধি পাইছিল।