বিশ্বনাথৰ বাঘমাৰীত প্ৰশাসনৰ বৃহৎ উচ্ছেদ অভিযান: ২৬৫ বিঘা ভূমি বেদখলমুক্ত কৰাৰ লক্ষ্য
বিশ্বনাথ জিলা প্ৰশাসনে আজি পুৱা ৭ বজাৰ পৰা বাঘমাৰী আৰু বিহালী অঞ্চলত এক বৃহৎ উচ্ছেদ অভিযান আৰম্ভ কৰিছে। চৰকাৰী তথ্য অনুসৰি, দীৰ্ঘদিন ধৰি অবৈধ দখলত থকা প্ৰায় ২৬৫ বিঘা ভূমি মুক্ত কৰাৰ লক্ষ্যৰে এই অভিযান চলোৱা হৈছে।
উচ্ছেদ অভিযানটো সূচাৰুৰূপে পৰিচালনা কৰিবলৈ সমগ্ৰ এলেকাটোক পাঁচটা মণ্ডলত বিভক্ত কৰা হৈছে। বিশ্বনাথৰ জিলা আয়ুক্তৰ নিৰ্দেশত অতিৰিক্ত আয়ুক্ত অসীম বৰগোহাঁই আৰু বিহালীৰ উপ-জিলাধিপতি প্ৰভাত পেগুৰ প্ৰত্যক্ষ তত্বাৱধানত চৰকাৰী বিষয়া-কৰ্মচাৰীৰ এটা বৃহৎ দলে এই কাৰ্যসূচীত অংশগ্ৰহণ কৰিছে।
পাৱাৰগ্ৰিড প্ৰকল্পৰ সমীপৱৰ্তী এলেকাত ২০ খনতকৈও অধিক বুলড’জাৰ আৰু জেচিবি মোতায়েন কৰা হৈছে।
কোনো ধৰণৰ অপ্ৰীতিকৰ পৰিস্থিতি ৰোধ কৰিবলৈ উচ্ছেদস্থলীত চুবুৰীয়া জিলাসমূহৰ পৰা অনা হাজাৰ হাজাৰ নিৰাপত্তাকৰ্মী মোতায়েন কৰা হৈছে।
প্ৰশাসনে পূৰ্বে এই বেদখলীকৃত ভূমিত বাস কৰা ৪৩৩ টা পৰিয়ালক উচ্ছেদৰ জাননী প্ৰেৰণ কৰিছিল। ইয়াৰে ৬৮ টা পৰিয়ালে গুৱাহাটী উচ্চ ন্যায়ালয়ৰ দ্বাৰস্থ হৈছিল আৰু ন্যায়ালয়ে তেওঁলোকৰ উচ্ছেদৰ ওপৰত স্থগিতাদেশ জাৰি কৰিছে। ফলস্বৰূপে, আদালতৰ সুৰক্ষা লাভ কৰা এই ৬৮ টা পৰিয়ালক বাদ দি বাকী পৰিয়ালসমূহৰ বিৰুদ্ধে আজি প্ৰশাসনে উচ্ছেদ চলাইছে।