সম্পূৰ্ণৰূপে সুস্থ অসমৰ আৰু তিনিগৰাকী ক’ভিড-১৯ আক্ৰান্ত, চিকিৎসালয়ৰ পৰা মুক্তি

পুনৰ তিনিগৰাকী ক’ভিড-১৯ পজিটিভ ৰোগী অসমত বৃহস্পতিবাৰে সম্পূৰ্ণৰূপে সুস্থ হৈছে।

খবিৰুদ্দিন আহমেদ, চাহজাহান আলি আহমেদ আৰু য়ুচোফ আলি নামৰ তিনিগৰাকী লোকক দুপৰীয়া চিকিৎসালয়ৰ পৰা মুক্তি দিয়া হৈছে।

গোৱালপাৰা জিলা অসামৰিক চিকিৎসালয়ৰ পৰা তিনিওগৰাকীকে মুক্তি দিয়া হৈছে।

লোক তিনিজনৰ দুটাকৈ পৰীক্ষাৰ পাছত নিগেটিভ ওলোৱা বাবে তেওঁলোকক মুক্তি দিয়া বুলি মন্ত্ৰী হিমন্ত বিশ্ব শৰ্মাই টুইটাৰ যোগে জানিবলৈ দিয়ে।

স্বাস্থ্য মন্ত্ৰী হিমন্ত বিশ্ব শৰ্মা আৰু ৰাজ্যিক স্বাস্থ্য মন্ত্ৰী পিযুষ হাজৰিকাৰ উপস্থিতিত ক’ৰ’নাৰ পৰা মুক্ত হোৱা তিনিওগৰাকী ৰোগীক ঘৰলৈ যাবলৈ দিয়ে গোৱালপাৰা অসামৰিক চিকিৎসালয় কতৃপক্ষই।

জানিব পৰা মতে লোক তিনিজনক স্বাস্থ্য মন্ত্ৰ্যালয়ৰ নিৰ্দেশ অনুসৰি আৰু ১৪ দিন নিজকে হোম কোৱাৰেণ্টাইনত থাকিবলৈ আহ্বান জনাইছে মন্ত্ৰী হিমন্ত বিশ্ব শৰ্মাই।

ইফালে ক’ভিড-১৯ৰ পৰা সম্পূৰ্ণৰূপে সুস্থ হৈ উঠা এই তিনিজন ব্যক্তিৰ পৰা সংক্ৰমণ আহিব বুলি কোনো লোকে ভয় খোৱাৰ কাৰণ নাই বুলিও মন্ত্ৰীগৰাকীয়ে উল্লেখ কৰে।