ৰাজ্যসভাত গৃহীত তিনি তালাক বিধেয়ক; ঐতিহাসিক আখ্যা অসমৰ সাংসদ বীৰেন্দ্ৰ প্ৰসাদ বৈশ্যৰ
মুছলমানসকলৰ বিবাহ বিচ্ছেদ বিষয়ক তিনি তালাক বিধেয়কখন মঙলবাৰে ৰাজ্যসভাত গৃহীত হয়।
ৰাজ্যসভাত শক্তিশালী যুক্তি তৰ্কৰ অন্তত বিধেয়কখনৰ সমৰ্থনত ৯৯ টা ভোট পৰাৰ বিপৰীতে ৮৪ টা ভোট বিধেয়কখনৰ বিপক্ষে পৰে।
উল্লেখযোগ্য যে, বিগত সপ্তাহত লোকসভাতো তিনি তালাক বিধেয়কখন গৃহীত কৰা হৈছিল আৰু ইয়াৰ পাছতে বিধেয়কখন ৰাজ্যসভাত উত্থাপন কৰিছিল কেন্দ্ৰীয় আইন মন্ত্ৰী ৰবিশংকৰ প্ৰসাদে।
ৰাজ্যসভাত গৃহীত হোৱাৰ পাছত ঐতিহাসিক তিনি তালাক বিধেয়কখন ৰাষ্ট্ৰপতিৰ অনুমোদনৰ বাবে পঠোৱা হ’ব আৰু ৰাষ্ট্ৰপতিৰ পৰা অনুমোদন লাভ কৰাৰ পাছতে বিধেয়কখন আইনত পৰিণত হ’ব।
তিনি তালাক বিধেয়ক অনুসৰি তিনি তালাক পদ্ধতিৰে বিবাহ বিচ্ছেদ দিলে তিনি বছৰ পৰ্য্যন্ত দোষীয়ে কাৰাবাস খাটিব লাগিব।
ইয়াৰ পূৰ্বে ভাৰতৰ উচ্চতম ন্যায়ালয়ে তিনি তালাক পদ্ধতিক অসাংবিধানিক আখ্যা দিছিল।
আনহাতে, আজি গৃহীত হোৱা তিনি তালাক বিধেয়কখনৰ সমৰ্থনত ৰাজ্যসভাত মত ব্যক্ত কৰি অসমৰ সাংসদ বীৰেন্দ্ৰ প্ৰসাদ বৈশ্যই ইয়াক ঐতিহাসিক আখ্যা দি আইন মন্ত্ৰী ৰবিশংকৰ প্ৰসাদক ধন্যাবদ জ্ঞাপন কৰে।
বৈশ্যই বিধেয়কখনে মুছলিম মহিলাসকল ন্যায় প্ৰদান কৰাৰ লগতে লিংগ বৈষম্যৰ পৰা মুক্তি দিব বুলি মন্তব্য কৰে।