কেমেৰাত ধৰা পৰিল আৰক্ষী বিষয়াক বিজেপি প্ৰাৰ্থীয়ে দিয়া হত্যাৰ ভাবুকি!

পশ্চিম ত্ৰিপুৰা লোকসভা সমষ্টিৰ বিজেপি প্ৰাৰ্থী প্ৰতিমা ভৌমিকে যোৱা ১১ এপ্ৰিলত অনুষ্ঠিত হোৱা নিৰ্বাচনৰ ভোটগ্ৰহণত ব্যাপক ৰিগিং আৰু হিংসাৰ সৈতে জড়িত থকাৰ প্ৰমাণ পোহৰলৈ আহিছে।

‘ত্ৰিপুৰা ইনফ’ৱে’ প্ৰকাশ কৰা এটি চাঞ্চল্যকৰ ভিডিঅ’ত বিজেপিৰ লোকসভাৰ প্ৰাৰ্থীজনে আৰক্ষীয়ে বিজেপিৰ উন্মত্ত সমৰ্থকৰ দ্বাৰা সংঘটিত কৰা ৰিগিং তথা হিংসা প্ৰতিৰোধ কৰিবলৈ চেষ্টা কৰাৰ বাবে এগৰাকী জ্যেষ্ঠ আৰক্ষী বিষয়াক কেনেকৈ চৰম পৰিণতিৰ ভাবুকি দিছে সেয়া দেখা গৈছে।

ভিডিঅ’ ফুটেজটোত বিজেপি প্ৰাৰ্থীগৰাকীয়ে ত্ৰিপুৰা আৰক্ষীৰ অতিৰিক্ত আৰক্ষী অধীক্ষক (নগৰাঞ্চল) কিৰন কুমাৰক হত্যাৰ ভাবুকি দিয়া দেখা গৈছিল।

‘ত্ৰিপুৰা ইনফ’ৱে’ প্ৰকাশ কৰা ভিডিঅ’টোত ভৌমিকে কোৱা স্পষ্টকৈ শুনা গৈছে যে ‘তেৰেকো হাম অভি মাৰ ডালেংগে’(মই এতিয়াই তোক মাৰি পেলাম)।

আছুতীয়া প্ৰতিবেদনটোত লগতে দাবী কৰা হৈছে যে ভৌমিকে ডিজিপিৰ পৰা আৰম্ভ কৰি আৰক্ষী অধীক্ষকলৈকে উচ্চ পৰ্যায়ৰ আৰক্ষী বিষয়াক তেওঁৰ চোৰাং কাৰবাৰৰ চক্ৰটোক সহযোগ নকৰিলে হত্যাৰ ভাবুকি দিয়াৰ লগতে তেওঁলোকৰ পৰিয়ালৰ সদস্য তথা সন্তানক অপহৰণ কৰাৰ মুকলিকৈ ভাবুকি দিয়ে।

প্ৰতিবেদনত অভিযোগ কৰা হৈছে যে ভৌমিকে বিপ্লৱ দেব চৰকাৰৰ পৃষ্ঠপোষকতাত ত্ৰিপুৰাত এটা চোৰাং ড্ৰাগছ কাৰবাৰৰ চক্ৰ চলাই আছে।

প্ৰতিবেদনটোত লগতে অভিযোগ কৰা হৈছে যে ভৌমিক আৰু ৰাজ্যখনৰ মুখ্য মন্ত্ৰী দেবে যোৱা ১১ এপ্ৰিলত অনুষ্ঠিত প্ৰথম পৰ্যায়ৰ ভোটগ্ৰহণত যৌথভাৱে ব্যাপক ৰিগিঙৰ ব্যৱস্থা কৰাৰ লগতে বিৰোধী নেতা-কৰ্মীসকলৰ বিৰুদ্ধে নৃশংস আক্ৰমণ চলাইছিল।

‘ত্ৰিপুৰা ইনফ’ৱে’ৰ জিম্মাত থকা ভিডিঅ’টো যোৱা ১২ এপ্ৰিলৰ পুৱতি নিশা ৩ বজাত শ্বুট কৰা বুলি  দাবী কৰিছে য’ত আগৰতলাৰ উপকণ্ঠ অঞ্চলৰ চানমাৰি এলেকাত বিজেপি প্ৰাৰ্থীগৰাকীয়ে ত্ৰিপুৰা আৰক্ষীৰ অতিৰিক্ত আৰক্ষী অধীক্ষক (নগৰাঞ্চল) কিৰন কুমাৰক ভাবুকি দিছিল। বাতৰি অনুসৰি, কুমাৰে ভৌমিকৰ হৈ একাংশ অপৰাধীয়ে চলোৱা সংগঠিত হিংসা তথা লুটপাত বন্ধ কৰাৰ বাবে ব্যস্ত হৈ আছিল।

এইবাৰ লোকসভা নিৰ্বাচনত অৱতীৰ্ণ হোৱা বিজেপি প্ৰাৰ্থীগৰাকীৰ বিৰুদ্ধে হত্যাকে ধৰি ব্যাপক অপৰাধৰ অভিযোগ আছে।

প্ৰতিবেদনটোত লগতে অভিযোগ কৰা হৈছে যে বিপ্লৱ দেবে মুখ্য মন্ত্ৰী হিচাপে কাৰ্যভাৰ গ্ৰহণ কৰাৰ পাছত এবছৰৰ ভিতৰতে ভৌমিকৰ বিশাল ড্ৰাগছৰ চোৰাং সাম্ৰাজ্যই অধিক বিস্তাৰ লাভ কৰিছে।