ত্ৰিপুৰাৰ স্বাস্থ্য মন্ত্ৰী সুদীপ ৰয় বৰ্মনক মন্ত্ৰীসভাৰ পৰা অপসাৰণ

ত্ৰিপুৰাৰ স্বাস্থ্য আৰু পৰিয়াল কল্যাণ বিভাগৰ মন্ত্ৰী সুদীপ ৰয় বৰ্মনক মুখ্য মন্ত্ৰী বিপ্লৱ কুমাৰ দেব নেতৃত্বাধীন ত্ৰিপুৰাৰ পোন্ধৰমহীয়া কাৰ্যকাল সম্পূৰ্ণ কৰা  বিজেপি-আইপিএফটি চৰকাৰখন পৰা অপসাৰণ কৰা হয়।

শুকুৰবাৰে নিশা ত্ৰিপুৰাৰ ভাৰপ্ৰাপ্ত মুখ্য সচিব কুমাৰ অলকৰ দ্বাৰা জাৰি কৰা এখন আনুষ্ঠানিক জাননীৰ পৰা এই কথা জানিব পৰা গৈছে।

‘’সুদীপ ৰয় বৰ্মনক মন্ত্ৰী সভাৰ সদস্য পদ খাৰিজ কৰা হৈছে,’’-জাননীখনত কোৱা হৈছে। জাননীখন অনুসৰি (নৰ্থইষ্ট নাওৰ লগত মজুত আছে) সুদীপ ৰয় বৰ্মনে চলাই থকা বিভাগকেইটাৰ দায়িত্ব মুখ্য মন্ত্ৰী বিপ্লৱ কুমাৰ দেবৰ হাতত অৰ্পণ কৰা হৈছে।

জাননীখনৰ মতে, মুখ্য মন্ত্ৰী বিপ্লৱ কুমাৰ দেবে বৰ্তমান দায়িত্বভাৰ গ্ৰহণ কৰি থকা আন বিভাগসমূহৰ উপৰি গড়কাপ্তানি, উদ্যোগ আৰু বাণিজ্য (আই টি) তথা স্বাস্থ্য আৰু পৰিকল্পনা বিভাগৰ দায়িত্বও গ্ৰহণ কৰিব।

একেখন জাননীতে, উপ-মুখ্য মন্ত্ৰী জিষ্ণু দেব বাৰ্মাক বিজ্ঞান, প্ৰযুক্তিবিদ্যা আৰু পৰিৱেশ বিভাগৰ দায়িত্ব অৰ্পণ কৰা হৈছে।

জাননীখনত উল্লেখ কৰা হৈছে যে নতুন দপ্তৰসমূহ মুখ্য মন্ত্ৰী বিপ্লৱ কুমাৰ দেবৰ পৰামৰ্শ অনুসৰি ত্ৰিপুৰাৰ ৰাজ্যপাল কাপ্টান সিং ছোলাংকীয়ে আৱন্টন কৰিছে।

জানিব পৰা মতে, মুখ্য মন্ত্ৰী বিপ্লৱ কুমাৰ দেব সুদীপ ৰয় বৰ্মনৰ দল বিৰোধী কাৰ্যকলাপত অসন্তুষ্ট হৈ আছিল। সদ্য সমাপ্ত লোকসভা নিৰ্বাচনত প্ৰচাৰ অভিযানত বৰ্মনক দেখা পোৱা নগৈছিল। তদুপৰি, তেওঁ ‘যোগ্য প্ৰাৰ্থীক’ ভোট দিবলৈ আহ্বান জনাইছিল যাৰ বাবে বিজেপিৰ শীৰ্ষ নেতা সন্তুষ্ট নাছিল।

অৱশেষত, ভাৰতীয় জনতা পাৰ্টি আৰু ইণ্ডিজেনাছ পীপলছ ফ্ৰন্ট অফ ত্ৰিপুৰাৰ মিত্ৰজোঁট চৰকাৰখন স্থাপনৰ এগৰাকী মূল ব্যক্তি হোৱা সত্ত্বেও বৰ্মনক অপসাৰণ কৰা হয়।

উল্লেখযোগ্য যে ২০১৬ চনত বৰ্মনপন্থী সাতগৰাকী বিধায়কে কংগ্ৰেছ ত্যাগ কৰি তৃণমূল কংগ্ৰেছত যোগদান কৰিছিল আৰু ইয়াৰ পাছতে তেওঁলোকে ২০১৭’ত গেৰুৱা দলটোত যোগদান কৰে।