বাগৰিত ট্ৰাক চকা ৱে’ল্দিঙত বিস্ফোৰণ, নিহত কিশোৰ, চূৰমাৰ দোকান

কলিয়াবৰ মহকুমাৰ বাগৰিত শুকুৰবাৰে দুপৰীয়া সংঘটিত এক শোকাৱহ দুৰ্ঘটনাত ট্ৰাকৰ এটা চকাৰ বিস্ফোৰণত থিতাতে নিহত হয় আশ্ৰাফুৰ ইচলাম নামৰ এজন কিশোৰ৷

৩৭নং ৰাষ্ট্ৰীয় পথৰ কাষতে থকা নিজ ঘৰৰ সন্মুখৰ ৱে’ল্ডিং দোকানত চকাটোৰ ৰিঙত ৱে’ল্ডিং কৰি থকা অৱস্থাতে টায়াৰটো বিস্ফোৰিত হয় আৰু থিতাতে নিহত হয় আশ্ৰাফুৰ।

বিস্ফোৰণটোত ট্ৰাকখনৰ হেণ্ডিমেন বিহাৰৰ জয়লাল নামৰ কিশোৰজনো গুৰুতৰভাৱে আহত হয়৷ সংকটজনক অৱস্থাত হেণ্ডিমেনজনক চিকিৎসাৰ বাবে প্ৰেৰণ কৰা হৈছে। আনহাতে ভয়ংকৰ বিস্ফোৰণটোৱে সম্পূৰ্ণৰূপে বিধ্বস্ত কৰি পেলায় দোকান ঘৰটোকো৷

ৱে’ল্ডিং কৰা সময়ত ট্ৰাকৰ চকাটোত হাৱা ভৰ্ত্তি হৈ থকাৰ বাবেই তাপ পোৱাৰ ফলত বায়ুচাপ বৃদ্ধি হৈ টায়াৰটো বিস্ফোৰণ হয় বুলি স্থানীয় লোকৰ পৰা জানিব পৰা গৈছে৷

স্থানীয় লোকে প্ৰকাশ কৰা মতে দোকানখনৰ গৰাকীয়ে নিহত আশ্ৰাফুল নামৰ আত্মীয় কিশোৰজনক দোকানখন চাবলৈ দি শুক্ৰবাৰৰ নামাজ পঢ়িবলৈ গৈছিল৷ সেই সময়তে ট্ৰাক চালকে চকাটো মেৰামতিৰ বাবে অনাত পৰিয়ালৰ লোকৰ অলক্ষিতে চকাৰ ৰিঙত ৱে’ল্ডিং কৰিছিল আশ্ৰাফুৰে৷