উত্তৰ কোৰিয়াৰ শাসক কিম জং উনৰ প্ৰচাৰিত মৃত্যুৰ সম্পৰ্কত কি ক’লে ৰাষ্ট্ৰপতি ড’নাল্ড ট্ৰাম্পে ?
আমেৰিকাৰ ৰাষ্ট্ৰপতি ড’নাল্ড ট্ৰাম্প সোমবাৰে মুখ খুলিছে উত্তৰ কোৰিয়াৰ একনায়কত্ববাদী শাসক কিম জং উনৰ মৃত্যুৰ সম্পৰ্কে প্ৰচাৰিত ৰহস্যঘন বাতৰি সন্দৰ্ভত।
উল্লেখ্য ইতিমধ্যে উত্তৰ কোৰিয়াৰ শাসকগৰাকীৰ স্বাস্থ্যকলৈ ৰহস্যৰ সৃষ্টি হৈছে। ইতিমধ্যে উনৰ মৃত্যু ঘটাৰ বাতৰি প্ৰকাশ পাইছিল যদিও এই সন্দৰ্ভত উত্তৰ কোৰিয়াই কোনো আনুষ্ঠানিক ঘোষণা কৰা নাই।
ইফালে উত্তৰ কোৰিয়াৰ চিৰ বৈৰী প্ৰতিবেশী ৰাষ্ট্ৰ দক্ষিণ কোৰিয়াই উনৰ মৃত্যু হোৱা নাই বুলি প্ৰকাশ কৰিছে।
কিছুদিন পূৰ্বে কিম জং উনৰ হৃদযন্ত্ৰৰ এক জটিল অস্ত্ৰোপচাৰ সম্পন্ন কৰা হৈছিল। ইয়াৰ পিছতে উনৰ মৃত্যুৰ বাতৰি বিয়পি পৰিছিল সমগ্ৰ বিশ্বজুৰি।
ইফালে দক্ষিণ কোৰিয়াৰ এক সূত্ৰ উদ্ধৃতি দি নিউয়ৰ্ক ডেইলীয়ে প্ৰকাশ কৰিছে যোৱা সপ্তাহত সম্পন্ন হোৱা অস্ত্ৰোপচাৰ পিছত উন ক্ৰমশঃ সুস্থ হৈ উঠিছে। অৱেশ্যে সংবাদ প্ৰতিষ্ঠানটোৱে এই সূত্ৰৰ নিশ্চিতিৰ সন্দৰ্ভত অজ্ঞতা প্ৰকাশ কৰিছে।
উনে ব্যৱহাৰ কৰা বিশেষ ৰেইলখনৰ অৱস্থিতিলৈ লক্ষ্য কৰি তেওঁক উত্তৰ কোৰিয়াৰ উনচন চহৰৰ এখন বিলাসী ৰিজ’ৰ্টত থকা বুলি ধাৰণা কৰিছে বিভিন্ন মহলে।
ইফালে কিম জং উনৰ সন্দৰ্ভত আমেৰিকাৰ ৰাষ্ট্ৰপতি ড’নাল্ড ট্ৰাম্পে মুখ খুলি কয়, ‘মই সঠিককৈ ক’ব নোৱাৰিম।’
হোৱাইট হাউছৰ এক সংবাদ মেলত ট্ৰাম্পে কয়, ‘হয়, মই ভালকৈ জানো, কিন্তু এই মুহূৰ্ত এই বিষয়ে একো ক’ব নোৱাৰিম। মই আশা কৰিম তেওঁ ভালে থাকক।’ ট্ৰাম্পে উনৰ সম্পৰ্কে পৃথিৱীজুৰি চলি থকা ৰহস্য সোনকালে অন্ত পৰিব বুলিও আশা প্ৰকাশ কৰিছে।
উল্লেখ্য যে, ড’নাল্ড ট্ৰাম্পে কিম জং উন তেওঁৰ এজন ভাল বন্ধু বুলিও দোহাৰে।