পুখুৰীত পৰি একেটা পৰিয়ালৰে দুই কন্যা শিশুৰ সলিল সমাধি; মৰিগাঁৱত শোকৰ ছাঁ

আজি দিনৰ ১১বজাত মৰিগাঁও জিলাৰ মিকিৰ ভেটা আৰক্ষী থানাৰ অন্তৰ্গত চাবুকধৰা গাঁৱৰ একেটা পৰিয়ালৰে দুজন ককাই-ভাইৰ দুই কন্যাৰ সলিল সমাধি ঘটা ঘটনাই সমগ্ৰ অঞ্চলটোতে শোকৰ ছাঁ পেলাইছে।

নিহত শিশু দুটিক প্ৰকাশ ডেউৰজাৰ আৰু শ্ৰীজিতুল ডেউৰজাৰ কন্যা ক্ৰমে ৰিতুশ্ৰী ডেউৰজা (৩ বছৰ) আৰু দেৱলীনা ডেউৰজা (১ বছৰ ৬ মাহ) বুলি জানিব পৰা গৈছে।

পৰিয়ালৰ লোকে জনোৱা অনুসৰী শিশু দুটিৰ মাক দুগৰাকী বন্ধন বেংকৰ মিটিঙলৈ যোৱাৰ লগতে ঘৰত আন কোনো মানুহ নথকাৰ সময়তে তেওঁলোক ঘৰৰ পৰা নোহোৱা হয়।

পিছত ঘৰৰ মানুহহে শিশু দুটিক ঘৰত নাপাই ওচৰে-পাঁজৰে বিচাৰ-খোঁচাৰ কৰে যদিও কোনো সন্ধান নোপোৱাত গাঁৱৰ মানুহৰ মাজত কৌতূহলৰ সৃষ্টি হয়। অৱশ্যে বহু সময় বিচৰাৰ পিছত তেওঁলোকৰ ঘৰৰ পুখুৰীৰ পানীত এটি শিশুৰ ৰঙা কাপুৰ ওপঙি থকা দেখা পাই আৰু ঘৰৰ মানুহে পুখুৰীত নামি গৈ শিশু দুটিক মৃত অৱস্থাত উদ্ধাৰ কৰে।

ঘটনাৰ খবৰ লাভ কৰি মিকিৰ ভেটা আৰক্ষী ঘটনাস্থলীত উপস্থিত হৈ নিহত শিশু দুটিক মৰিগাঁও অসামৰিক চিকিৎস্যালয়লৈ আনি মৰোণত্তৰ পৰীক্ষা কৰোৱাই পৰিয়ালক চমজায় দিয়ে।