গোলাঘাটত পুনৰ দুগৰাকী ক’ৰ’না পজিটিভ; ৰাজ্যত আক্ৰান্তৰ সংখ্যা ১০৮ লৈ বৃদ্ধি

ৰাজ্যত পুনৰ দুগৰাকী লোকৰ শৰীৰত ক’ৰ’না ভাইৰাছৰ উপস্থিতি ধৰা পৰিছে।

ক’ৰ’নাত আক্ৰান্ত হোৱা লোক দুগৰাকী গোলাঘাট জিলাৰ।

ইয়াৰ ফলত ৰাজ্যত ক’ৰ’নাত আক্ৰান্ত হোৱা লোকৰ সংখ্যা ১০৮ গৰাকীলৈ বৃদ্ধি পালে।

স্বাস্থ্য মন্ত্ৰী হিমন্ত বিশ্ব শৰ্মাই টুইটাৰযোগে এই কথা প্ৰকাশ কৰে।

আনহাতে, আজিৰ দিনটোতে গোলাঘাট জিলাত মুঠ ৪ গৰাকী লোকৰ শৰীৰত ক’ৰ’নাৰ উপস্থিতি ধৰা পৰে। ৰাতিপুৱাৰ ভাগতো গোলাঘাট জিলাৰ দুগৰাকী ব্যক্তিৰ পৰীক্ষাৰ ফলাফল পজিটিভ আহিছিল।

গোলাঘাটৰ চাৰি গৰাকী ক’ৰ’না আক্ৰান্তৰ উপৰিও আজি কাছাৰ জিলাত দুগৰাকী, যোৰহাটত এগৰাকী আৰু নগাঁৱত এগৰাকী লোক ক’ৰ’নাত আক্ৰান্ত হয়।

উল্লেখযোগ্য যে, ৰাজ্যত ১০৮ গৰাকী লোক ক’ৰ’নাত আক্ৰান্ত হোৱাৰ বিপৰীতে ৪১ গৰাকী লোক চিকিৎসাৰ অন্তত সুস্থ হৈ উঠিছে। বৰ্তমান ৬২ গৰাকী ক’ৰ’না সক্ৰিয় ৰোগী চিকিৎসাধীন হৈ আছে।

অসমত ক’ৰ’নাৰ ফলত এতিয়ালৈ তিনি গৰাকী লোকে প্ৰাণ হেৰুৱাইছে।