পাকিস্তানত উগ্ৰপন্থীৰ ভয়ংকৰ আক্ৰমণ; বিস্ফোৰণত নিহত কমেও ২১ জন, আহত ২৫জন

পাকিস্তানৰ উত্তৰ-পশ্চিম প্ৰদেশ খাইবাৰ পখতুনখোৱাৰ ডেৰা ইছমাইল খান জিলাৰ এটা চাউনীত সংঘটিত হৈছে দুটাকৈ আত্মঘাতী বোমা বিস্ফোৰণৰ ঘটনা। এই ঘটনাত আক্ৰমণকাৰীকে ধৰি মুঠ ২১জন লোক নিহত হয়।

নিহতসকলৰ ভিতৰত ৬জন আক্ৰমণকাৰী, বাকীসকল সাধাৰণ নাগৰিক আৰু আক্ৰমণৰ বলি। এই সাধাৰণ নাগৰিকৰ ভিতৰত আছে ৪ টা শিশু আৰু ২ গৰাকী মহিলা। নিহত হোৱা ছয়জন আক্ৰমণকাৰীকো চিনাক্ত কৰা হৈছে। নিহত ছয়জন লোক নিষিদ্ধ তেহৰিক-ই-তালিবান পাকিস্তানৰ সদস্য আছিল।

এই কাণ্ডৰ সাক্ষী এজন সেনা বিষয়াই ৰয়টাৰ্ছক জনোৱা মতে, মঙলবাৰে সন্ধিয়া মানুহে ৰোজা ভংগ কৰাৰ সময়তে দুখন বিস্ফোৰক ভৰ্তি বাহন সামৰিক বেৰেকৰ অঞ্চলত প্ৰৱেশ কৰে। তাৰ পিছতে লগে লগে বিস্ফোৰণ ঘটে। তেওঁ লগতে জনায় যে বিস্ফোৰণৰ ফলত ওচৰৰ এটা মছজিদ আৰু এটা ঘৰৰ চাদ ভাঙি পৰে।

আক্রমণত নিহত সকলক ওচৰৰ জিলা সদৰ চিকিৎসালয়লৈ লৈ যোৱা হয়৷ চিকিৎসালয়ৰ এগৰাকী মুখপাত্ৰই পাকিস্তানৰ সংবাদ মাধ্যম জিঅ’ নিউজক জনোৱা মতে, মৃত্যু হোৱা লোকসকলৰ ভিতৰত ১৫ জন সাধাৰণ নাগৰিক। তদুপৰি এই ঘটনাত আন ২৫ জন লোক আহত হয়।

ইয়াৰ আগদিনা অৰ্থাৎ সোমবাৰে খাইবাৰ পখতুনখোৱাৰ এখন মাদ্ৰাছাত আত্মঘাতী বোমা বিস্ফোৰণ সংঘটিত হৈছিল। তাত স্থানীয় তালিবানৰ এজন শীৰ্ষ নেতাকে ধৰি ছয়জন লোক নিহত হয়।