ৰাছিয়াৰ ৰকেট আক্ৰমণত নিহত ইউক্ৰেইনৰ জনপ্ৰিয় অভিনেত্ৰী ওকছানা শভেটছ

ইউক্ৰেইনৰ ৰাজধানী কীয়েভৰ আৱাসিক অঞ্চলত ৰাছিয়াৰ সেনা বাহিনীৰ ৰকেট আক্ৰমণত নিহত হৈছে দেশখনৰ জনপ্ৰিয় অভিনেত্ৰী ওকছানা শভেটছ। শুকুৰবাৰে অভিনেত্ৰীগৰাকীৰ ‘ইয়ং থিয়েটাৰ’ নামৰ দলটোৱে এক বিবৃতিত এই কথা জানিবলৈ দিছে।

ওকছানাৰ বয়স আছিল ৬৭ বছৰ। কিছুদিন পূৰ্বে তেওঁ শিল্পীসকলৰ বাবে প্ৰদান কৰা ইউক্ৰেইনৰ সৰ্বোচ্চ সন্মান ‘ওনাৰ্ড আৰ্টিষ্ট অফ ইউক্ৰেইন’ লাভ কৰিছিল।

ইউক্ৰেইনৰ প্ৰশাসনে অভিযোগ কৰি আহিছিল যে এইবাৰ ৰাছিয়াৰ পুটিন বাহিনীয়ে সামৰিক বাহিনীৰ বিপৰীতে দেশখনৰ সাধাৰণ নাগৰিকৰ ওপৰত আক্ৰমণ আৰম্ভ কৰিছে।

লগতে পঢ়ক: আলফা স্বাধীনলৈ পুনৰ ৫ যুৱক

ইয়াৰ পূৰ্বেও কীয়েভকে ধৰি ইউক্ৰেইনৰ কেইবাখনো চহৰৰ দোকান-পোহাৰ, ঘৰ, বিদ্যালয় আৰু হাস্পাতালৰ ওপৰত ৰাছিয়াই ক্ষেপনাস্ত্ৰেৰে আক্ৰমণ চলোৱাৰ অভিযোগ উঠিছিল। তাতো সাধাৰণ নাগৰিকে প্ৰাণ হেৰুৱাবলগীয়া হৈছিল।

ইপিনে, ৰাছিয়াৰ প্ৰতিৰক্ষা মন্ত্ৰালয়ে দাবী কৰি আহিছে যে তেওঁলোকে কেবল ইউক্ৰেইনৰ সেনা ছাউনীক লক্ষ্য কৰিহে সামৰিক অভিযান চলাইছে।

লগতে পঢ়ক:ৰাছিয়ান মডেলৰ ৰহস্যজনক মৃত্যু; কিয় নাম সাঙোৰ খালে ৰাষ্ট্ৰপতি পুটিনৰ?

যোৱা ২৪ ফেব্ৰুৱাৰীৰ পৰা ইউক্ৰেইনত ৰাছিয়াই সামৰিক অভিযান চলাইছে আৰু শুকুৰবাৰে এই অভিযানে ২৩ দিনত ভৰি দিছে।এই সামৰিক অভিযানৰ সময়ত ৰাছিয়াৰ সেনা বাহিনীয়ে ইতিমধ্যে ইউক্ৰেইনৰ কেইবাখনো চহৰ দখল কৰিছে।