“সাৰ্বভৌমত্ব” চৰ্ত অবিহনে আলোচনা অসম্ভৱ : পুনৰ স্পষ্ট কৰিলে পৰেশ বৰুৱাই

শেহতীয়া সকলো জল্পনা-কল্পনাৰ ওৰ পেলাই আলফা (স্বা:)ই এইটো পুনৰ স্পষ্ট কৰি দিছে যে সাৰ্বভৌমত্ব এটা চৰ্ত অবিহনে চৰকাৰৰ সৈতে আলোচনাত বহাটো সম্ভৱ নহয়।

“আমি সদায়ে কৈ আহিছো যে “সাৰ্বভৌমত্ব” আলোচনাৰ মূল বিন্দু হ’ব লাগিব। আন কথা কোৱাৰ কোনো সকাম নাই। চৰকাৰক প্ৰথমে সাৰ্বভৌমত্ব বিষয়ত আলোচনা কৰিবলৈ আৰু তাৰ পিছত কিয় সাৰ্বভৌমত্ব নাপাওঁ আমাক বুজাবলৈ চেষ্টা কৰিবলৈ দিয়ক”, আছাম ট্ৰিবিউনত বৰুৱাৰ এই উদ্ধৃতি।

বৰুৱাই সংগঠনটোৱে চৰকাৰৰ সৈতে কথা পাতি আছে বুলি ওলোৱা বাতৰিও সম্পূৰ্ণ অস্বীকাৰ কৰে।

তেওঁ কয়, চৰকাৰৰ কোনো প্ৰতিনিধিয়ে তেওঁ বা আন কোনো জ্যেষ্ঠ নেতা (আলফা স্বাধীনৰ)ৰ সৈতে যোগাযোগ কৰা নাই। লগতে আলফা স্বাধীনেও চৰকাৰৰ সৈতে যোগাযোগ কৰা নাই।

সংবাদ মাধ্যমৰ জৰিয়তে একাধিক মন্ত্ৰী, বিধায়কে আলফা (স্বা:)ক আলোচনালৈ অনাৰ কথা কৈ অহা সন্দৰ্ভত তেওঁ বৰুৱাই কয়, “আমি সংবাদ মাধ্যমত আমাক আলোচনালৈ মাতি কৰা মন্ত্ৰীসকলৰ আৱেদন-নিৱেদন দেখি আছো আৰু আমিও আমাৰ স্থিতি সংবাদ মাধ্যমৰ জৰিয়তেই স্পষ্ট কৰি আহিছো”।

আনহাতে তেওঁৰ শৈশৱৰ বন্ধু ৰেৱতী ফুকনে কেন্দ্ৰৰ হৈ তেওঁৰ সৈতে সম্পৰ্ক ৰক্ষা কৰি আছে বুলি ওলোৱা বাতৰিও অস্বীকাৰ কৰে।

ফুকন যোৱা ২০১৮ চনৰ ২২ এপ্ৰিলত অম্বিকাগিৰী নগৰৰ নিজা বাসগৃহৰ পৰা প্ৰাতঃভ্ৰমণ কৰিবলৈ ওলাই গৈ নিৰুদ্দেশ হৈছিল।

“ফুকন আমাৰ সৈতে যোগাযোগত নাই। আমি জানো যে তেওঁ নিৰুদ্দেশ হোৱাৰ সময়ত সুস্থ নাছিল। তেওঁৰ সন্ধান উলিওৱাত চৰকাৰী এজেন্সিবোৰৰ ব্যৰ্থতা দুৰ্ভাগ্যজনক”, বৰুৱাই কয়।

উল্লেখযোগ্য যে নিৰুদ্দিষ্ট ৰেৱতী ফুকন পি চি জিৰো এজন সদস্য আছিল, যি পি চি জি আলফা-কেন্দ্ৰ আলোচনাৰ মধ্যস্থতা কৰিবৰ বাবে গঠন কৰা হৈছিল। পি চি জিৰ প্ৰথমখন বৈঠক আছিল ২০০৫ চনৰ ২৬ অক্টোবৰত আৰু বৈঠকত তেতিয়াৰ প্ৰধান মন্ত্ৰী মনমোহন সিঙ উপস্থিত আছিল।

পিছত চৰকাৰৰ আন্তৰিকতাহীনতাৰ অভিযোগ আনি পি চি জি মধ্যস্থতাকাৰীৰ ভূমিকাৰ পৰা আঁতৰি আহিছিল।