T-20 World Cup: ক্ৰমাগত চতুৰ্থ জয়েৰে ছেমিত পাকিস্তান
সুন্দৰ প্ৰদৰ্শন অব্যাহত ৰাখি ডুবাইত চলিত টি-২০ বিশ্বকাপৰ ছেমি ফাইনেলত প্ৰৱেশ কৰা দ্বিতীয় দলত পৰিগণিত হৈছে পাকিস্তান। ইয়াৰ পূৰ্বে, ইংলেণ্ডে অন্তিম-৪ ত স্থান লাভ কৰিছে।
পাকিস্তানে কালি নিশা গ্ৰুপৰ এখন খেলত নামিবিয়াক ৪৫ ৰাণত পৰাস্ত কৰে। গ্ৰুপত দলটোৰ একেৰাহে চতুৰ্থ জয়।
প্ৰথমে বেটিং কৰি পাকিস্তানে প্ৰথম ইনিংছত ২ উইকেটত ১৮৯ ৰাণ সংগ্ৰহ কৰে। এই শক্তিশালী স্থিতিৰ মূলতে আছিল অপেনাৰদ্বয় মহম্মদ ৰিজৱান আৰু অধিনায়ক বাবৰ আজমৰ মাৰমুখী বেটিং।
দুয়োৱে প্ৰথম উইকেটত ১১৩ ৰান যোগ দিয়াৰ পাছত ব্যক্তিগত ৭০ ৰান সংগ্ৰহ কৰি বাবৰ আউট হয়। ৰিজৱানে ৭৯ ৰান সংগ্ৰহ কৰি অপৰাজিত থাকে। ব্যৰ্থ হয় বছৰ জামান(৫)। পিছলৈ মহম্মদ হাফিজে আক্ৰমণাত্মক বেটিঙেৰে ১৬ টা বলত ৩২ ৰান সংগ্ৰহ কৰে।
নামিবিয়াৰ হৈ উইজি আৰু ফ্ৰিলিঙ্কে এটাকৈ উইকেট লাভ কৰে।
১৯০ ৰানৰ লক্ষ্য অনুসৰণ কৰি নামিবিয়াই দ্বিতীয় অভাৰত মাইকেল ভান লিংগেনৰ (৪) উইকেট হেৰুৱায়। ষ্টিফেন বাৰ্ড (২৯) আৰু ক্ৰেগ উইলিয়ামছে (৪০)পাকিস্তানৰ বলিং লাইন আপৰ সন্মুখত কিছু প্ৰত্যাহ্বানৰ সৃষ্টি কৰিছিল যদিও দীঘলীয়া ইনিংছ খেলিব নোৱাৰিলে। ডেভিদ ৱিজে সৰ্বাধিক ৪৩ ৰাণ কৰি অপৰাজিত থাকে।
নিৰ্ধাৰিত ২০ অভাৰত নামিবিয়াই ৫ উইকেটৰ বিনিময়ত ১৪৪ ৰানহে সংগ্ৰহ কৰে আৰু ৪৫ ৰানত পৰাজয় স্বীকাৰ কৰে।
৭৯ ৰানৰ আক্ৰমণাত্মক ইনিংছটোৰ বাবে ৰিজৱান মেচৰ শ্ৰেষ্ঠ খেলুৱৈ হিচাপে বিবেচিত হয়।
উল্লেখ্য যে এইবাৰৰ সৈতে পাকিস্তানে টি-২০ বিশ্বকাপৰ ইতিহাসত পঞ্চম বাৰৰ বাবে ছেমি ফাইনেলত প্ৰৱেশ কৰিছে। দলটোৱে ২০০৯ চনৰ বিশ্বকাপত চেম্পিয়নৰ খিতাপ অৰ্জন কৰিছিল। পাকিস্তানক এইবাৰৰ বিশ্বকাপতো খিতাপৰ প্ৰৱল দাবীদাৰ বুলি গণ্য কৰা হৈছে।