বিশ্ব ঐতিহ্য ক্ষেত্ৰ ঘোষিত হ’ব নে চৰাইদেউ! ৭ অক্টোবৰত চৰাইদেউলৈ ইউনেস্ক’ৰ দল

আহোমৰ প্ৰথম ৰাজধানী ঐতিহাসিক চৰাইদেউক বিশ্ব ঐতিহ্য ক্ষেত্ৰ ঘোষণাৰ বাবে দীৰ্ঘদিন ধৰি প্ৰচেষ্টা চলি আহিছে। এনে চৰ্চাৰ মাজতে অহা ৭ অক্টোবৰত চৰাইদেউ পৰিদৰ্শন কৰিব ইউনেস্ক’ৰ এটা বিশেষজ্ঞ দলে।

এই বিশেষজ্ঞ দলটোৱে চৰাইদেউৰ মৈদাম স্থান পৰিদৰ্শন কৰি সংৰক্ষণৰ প্ৰচেষ্টা, ভৱিষ্যতৰ পৰিকল্পনাৰ লগতে অন্যান্য আনুসংগিক বিভিন্ন দিশসমূহৰ মূল্যায়ন কৰাৰ সম্ভাৱনা আছে।

উল্লেখ্য যে, কেন্দ্ৰই শেহতীয়াকৈ এই ঐতিহাসিক চৰাইদেউক ইউনেস্ক’ৰ সন্মানীয় বিশ্ব ঐতিহ্য ক্ষেত্ৰ টেগৰ বাবে মনোনীত কৰিছে।

ইউনেস্ক’ৰ দ্বাৰা এই সন্মান লাভ কৰিলে কাজিৰঙা ৰাষ্ট্ৰীয় উদ্যান আৰু মানস ৰাষ্ট্ৰীয় উদ্যানৰ পিছত অসমৰ তৃতীয় বিশ্ব ঐতিহ্য ক্ষেত্ৰ হিচাপে পৰিগণিত হ’ব চৰাইদেউ।

ইউনেস্ক’ৰ দলটোৰ এই ভ্ৰমণৰ পূৰ্বে শনিবাৰে অসম চৰকাৰে গঠন কৰা মন্ত্ৰীৰ এটা দলে এই প্ৰত্নতাত্ত্বিক স্থান পৰিদৰ্শন কৰে।

কেশৱ মহন্ত, নন্দিতা গোৰ্লোছা, যোগেন মোহন আৰু জয়ন্ত মল্ল বৰুৱাৰে গঠিত এই দলটোৱে প্ৰত্নতাত্ত্বিক স্থানটিৰ গাঁথনিগত সংৰক্ষণৰ কাম, সুৰক্ষা ব্যৱস্থা, খননৰ প্ৰয়োজনীয়তা, আন্তঃগাঁথনি উন্নয়ন ইত্যাদিৰ বুজ লয়।

লগতে তেওঁলোকে চৌহদৰ ভিতৰত অৱস্থিত সংগ্ৰহালয়টোও পৰিদৰ্শন কৰে আৰু ছ্যুকাফা সংগ্ৰহালয়ত এখন বৈঠক অনুষ্ঠিত কৰি বিভিন্ন দিশসমূহৰ পৰ্যালোচনা কৰে।

ইউনেস্ক’ৰ দলটোৰ ভ্ৰমণৰ পূৰ্বে প্ৰয়োজনীয় প্ৰস্তুতি সম্পূৰ্ণ কৰিবলৈ সংশ্লিষ্ট সকলো বিষয়াক নিৰ্দেশ দিয়ে অসম চৰকাৰৰ প্ৰতিনিধি দলটোৱে। উল্লেখ্য যে, ইউনেস্ক’ৰ দলটোৱে চৰাইদেউ মৈদাম স্থানত দুদিন কটাব বুলি জানিব পৰা গৈছে।