মুকলি আকাশৰ তললৈ বিদ্ৰোহী ৰাজকুমাৰ মেগেন

মণিপুৰী বিদ্ৰোহী সংগঠন ইউনাইটেদ নেচনেল লিবাৰে’চন ফ্ৰণ্টৰ অধ্যক্ষ ৰাজকুমাৰ মেগেন ওৰফে চানা ইয়াইমাই জে’লৰ পৰা মুক্তি পাইছে, তেওঁৰ সৈতে ঘনিষ্ঠ এক সূত্ৰত প্ৰকাশ।

যোৱা ১০ বছৰে বন্দী হৈ থকা মেগেনক নিৰ্ধাৰিত মুক্তিৰ দিনতকৈ এদিন পূৰ্বে শনিবাৰে সন্ধিয়া প্ৰায় ৫:৩০ বজাত খুব গোপনে গুৱাহাটী কেন্দ্ৰীয় কাৰাগাৰৰ পৰা মুক্তি দিয়া হৈছে।

কাৰাগাৰৰ বিষয়াই নৰ্থইষ্ট নাওত এই কথা নিশ্চিত কৰিছে।

পৰিয়ালৰ সূত্ৰমতে, মেগেন সোমবাৰে ইম্ফালত উপস্থিত হোৱাৰ সম্ভাৱনা আছে। আৰু তেওঁক অতি উমাল আদৰণি জনোৱা হ’ব— কিন্তু কোনে আদৰণি জনাব সেয়া স্পষ্ট নহয়।

তেওঁলোকে জনোৱামতে, তেওঁ কাংলা উতাৰা (কাংলা দুৰ্গ) দৰ্শন কৰি তাত পুষ্পাঞ্জলি তৰ্পণ কৰিব পাৰে।

মেগেনে কাৰাগাৰত তেওঁৰ যোগাত্মক অৱদানৰ বাবে শাস্তিম্যাদত কিছুমাহৰ ৰেহাই লাভ কৰিছিল।

গুৱাহাটী কাৰাগাৰৰ ভিতৰত আৱাসীসকলৰ বাবে পুথিভঁৰাল, এখন সংগীত বিদ্যালয় আৰু এক শিলৰ উদ্যান নিৰ্মাণত তেওঁ বৰঙনি আগবঢ়াইছিল।

মেগেন আলোচনাৰ মেজলৈ আহিলে “তেওঁৰ কাৰাৱাস  সন্দৰ্ভত কিবা এটা” কৰাৰ প্ৰস্তাৱ কোনো “অজ্ঞাত চৰকাৰী প্ৰতিনিধিয়ে” আগবঢ়াইছিল বুলি পূৰ্বে বাতৰি প্ৰকাশিত হৈছিল।

কিন্তু, বন্দিত্বৰ কালচোৱাত মেগেনে স্বাধীন মণিপুৰৰ দাবী পৰিহাৰ কৰা নাছিল আৰু বিষয়টোত তেওঁ গণভোটৰ দাবী জনাই আহিছে।

এন আই এই মেগেন আৰু তেওঁৰ ১৭জন সতীৰ্থৰ বিৰুদ্ধে ৪হাজাৰ পৃষ্ঠাৰ এক অতিৰিক্ত চাৰ্জশ্বীট দাখিল কৰিছিল।

কিন্তু আদালতে তেওঁলোকক “সন্ত্ৰাসবাদী কাৰ্য্যকলাপ”ত দোষী সাব্যস্ত কৰিবলৈ অস্বীকাৰ কৰিছিল।

“এইটো দেখা গৈছে যে অভিযুক্তকেইগৰাকীয়ে কোনো সন্ত্ৰাসবাদী কাৰ্য্যকলাপ কৰা বুলি আচলতে কোনো সিদ্ধান্তদায়ী প্ৰমাণ নাই,” এয়া আছিল ন্যায়াধীশৰ মন্তব্য।

ইউ এন এল এফ নেতাকেইজনক বেআইনী কাৰ্য্যকলাপ (প্ৰতিৰোধ) আইনৰ ১৬নং ধাৰাত দোষী সাব্যস্ত কৰিব নোৱাৰি বুলি আদালতে ৰায় দিছিল।

বিচাৰৰ শুনানিত মেগেনে তেওঁৰ যুঁজৰ ন্যায্যতা প্ৰতিপন্ন কৰাৰ চেষ্টা কৰিছিল।

“মই ভাৰতৰ পৰা পৃথক হ’বলৈ নহয়, বৃটিশ্ব আৰু তাৰ পিছত ভাৰতে কাঢ়ি অহা মণিপুৰৰ স্বাধীনতা পুনৰুদ্ধাৰৰ বাবেহে যুঁজিছো,” আদালতৰ বাহিৰত অপেক্ষাৰত সাংবাদিকক তেওঁ কৈছিল।

বহুকেইজন বিচাৰাধীন বন্দীয়ে বিভিন্ন কাৰণত জামিন বিচাৰিছিল যদিও মেগেনে জামিনৰ আবেদন কৰা নাছিল আৰু গুৱাহাটী কেন্দ্ৰীয় কাৰাগাৰতে বন্দী আছিল।

এন আই এই মেগেনৰ যাৱজ্জীৱন কাৰাদণ্ড বিচাৰিছিল যদিও আদালতে তেওঁক ২০১৬ চনত ১০ বছৰৰ কাৰাদণ্ড বিহিছিল।

একেটা গোচৰতে আন ১৭গৰাকী ইউ এন এল এফ বিদ্ৰোহীকো সাতৰ পৰা দহ বছৰৰ কাৰাদণ্ড বিহা হৈছিল।

বাকীকেইজন আছিল— টি হেৰ’জিত, অ’ চমৰজিত, ডব্লিউ নৰেন, এম চৰত, এচ গুনে, বেম্বেম চানু, লান্ধনি দেৱি, অ’ ম’নিটন, এন দিলীপ, এল জাতিচ’ৰ, এম জয়, এন বমি, ৱাই ব্ৰজবিধু আৰু এ ইবমচা।

এন আই এই ভাৰতীয় দণ্ড বিধিৰ ১২০বি, ১২১, ১২১ (এ) আৰু ১২২ ধাৰাত তেওঁলোকৰ বিৰুদ্ধে গোচৰ ৰুজু কৰিছিল।

ভাৰতীয় সংস্থাসমূহে তেওঁক বিহাৰৰ ম’তিহাৰীত ২০১০ চনৰ ডিচেম্বৰত গ্ৰেপ্তাৰ কৰা বুলি কৈছিল যদিও, মেগেন বাংলাদেশত বন্দী হোৱা বুলি বাতৰি প্ৰকাশ পাইছিল।

বাতৰিমতে, তেওঁ ২০১০ চনৰ চেপ্তেম্বৰত বাংলাদেশী চোৰাংচোৱাৰ হাতত বাংলাদেশত গ্ৰেপ্তাৰ হৈছিল।

মেগেন বৃটিশ্বৰ বিৰুদ্ধে যুঁজা প্ৰবাদপ্ৰতিম মণিপুৰী বীৰ টিকেন্দ্ৰজিতৰ প্ৰত্যক্ষ উত্তৰসূৰী। টিকেন্দ্ৰজিতক পিছত বৃটিশ্বে ফাঁচি দিছিল।

ইউ এন এল এফ গঠন হৈছিল ১৯৬৪ চনৰ ২৪ নৱেম্বৰত। তেওঁলোকৰ লক্ষ্য মণিপুৰৰ স্বাধীনতা।