কোভিড-১৯ত আক্ৰান্ত উত্তৰ প্ৰদেশৰ কেবিনেট মন্ত্ৰী কমল ৰাণী বৰুণৰ মৃত্যু

উত্তৰ প্ৰদেশৰ কেবিনেট মন্ত্ৰী কমল ৰাণী বৰুণৰ কোভিড-১৯ত আক্ৰান্ত হৈ দেওবাৰে মৃত্যু হৈছে। তেওঁ ৰাজ্যখনৰ কাৰিকৰী শিক্ষা বিভাগৰ মন্ত্ৰী আছিল।

উত্ৰ প্ৰদেশ বিধানসভাৰ সদস্য কমল ৰাণী বৰুণ ইয়াৰ পূৰ্বে সাংসদো আছিল।

কোভিড-১৯ পজিটিভ পোৱাৰ পাছত তেওঁ লক্ষ্ণৌৰ পিজিআই হাস্পাতলত চিকিৎসাধীন হৈ আছিল।

যোৱা ১৮ জুলাইত কৰ’না আক্ৰান্ত হৈছিল মন্ত্ৰীগৰাকী।মৃত্যুৰ সময়ত তেওঁৰ বয়স হৈছিল ৬২বছৰ।

মন্ত্ৰীসভাৰ কেবিনেট মন্ত্ৰী কমল ৰাণী বৰুণৰ মৃত্যুত মুখ্য মন্ত্ৰী যোগী আদিত্যনাথে গভীৰ শোক প্ৰকাশ কৰিছে।

মুখ্য মন্ত্ৰীগৰাকীয়ে শোক প্ৰকাশ কৰি  টুইটত লিখিছে যে ‘মোৰ সহযোগী কেবিনেট মন্ত্ৰী শ্ৰীমতী কমল ৰাণী বৰুণৰ অকাল মৃত্যুৰ খৱৰএ শোকস্তব্ধ কৰি তুলিছে। ৰাজ্যখনে আজি এগৰাকী সমৰ্পিত জননেত্ৰীক হেৰুৱালে। তেওঁৰ পৰিয়াললৈ মোৰ সমবেদনা জনালো।‘

মুখ্য মন্ত্ৰীৰ কাৰ্যালয়ৰ পৰা কৰা টুইটত উল্লেখ কৰা মতে দেওবাৰে পুৱা প্ৰায় ৯বাজি ৩০ মিনিটত কেবিনেট মন্ত্ৰী কমল ৰাণী বৰুণৰ পৰলোকপ্ৰাপ্তি ঘটে।

ৰাজ্যখনৰ ঘাটমপুৰ, কানপুৰ নগৰৰ পৰা বিধায়ক হিচাপে নিৰ্বাচিত শ্ৰীমতী বৰুণ ইয়াৰ পূৰ্বে একাদশ আৰু দ্বাদশ লোকসভাৰ সদস্য নিৰ্বাচিত হৈছিল।