আমোদজনক! কি পৰিস্থিতিত পিতৃ-মাতৃয়ে নৱজাতকৰ নাম ৰাখিলে ‘লকডাউন যাদৱ’?

মধ্য প্ৰদেশৰ বুৰহানপুৰত এটি সন্তান জন্ম দিয়া মহিলাই নৱজাতকৰ নাম ৰাখিলে ‘লকডাউন যাদব’।

লকডাউনৰ জটিল পৰিস্থিতিৰ মাজত জন্ম হোৱাৰ বাবেই নৱজাতকৰ নাম পিতৃ-মাতৃয়ে লকডাউন যাদব ৰাখে।

শ্ৰমিক এক্সপ্ৰেছত আহি থকা মহিলাগৰাকীৰ ৰাস্তাতে প্ৰসৱ বেদনা আৰম্ভ হোৱাত শুকুৰবাৰে বুৰহানপুৰৰ জিলা হাস্পাতলত ভৰ্তি কৰোৱা হয়।

ইয়াতেই মহিলাগৰাকীয়ে ‘লকডাউন যাদব’ক জন্ম দিয়ে।

‘লকডাউন যাদব’ক বহুতেই ভাগ্যৱান বুলি ক’ব খোজে কিয়নো তাৰ জন্মৰ পাছতেই ৰাজ্যখনৰ মুখ্য মন্ত্ৰী শিৱৰাজ সিং চৌহানে মাতৃগৰাকীক শুভেচ্ছা দিয়ে।

মুখ্য মন্ত্ৰী শিৱৰাজ সিং চৌহানে টুইট কৰি লিখে,’’আমাৰ ভনীগৰাকীয়ে শ্ৰমিক ৰে’লেৰে মুম্বাইৰ পৰা নিজৰ ৰাজ্য উত্তৰ প্ৰদেশলৈ গৈ আছিল। বুৰহানপুৰত তেওঁক এখন হাস্পাতলত ভৰ্তি কৰোৱা হয়। য’ত তেওঁ মোৰ ভতিজাক জন্ম দিলে। লকডাউনত সন্তানৰ জন্ম হোৱাৰ বাবে ভনীয়ে পুত্ৰৰ নাম ‘লকাডাউন যাদব’ ৰখাৰ সিদ্ধান্ত লয়। কণমানি লকডাউনলৈ শুভেচ্ছা জনালো।‘’

চৌহানে লগতে কয়, ‘’কণমানি লকডাউন যাদব’লৈ বহুত মৰম! বুৰহানপুৰৰ কালেক্টৰ, ৰেইলৱে তথা স্থানীয় কৰ্মচাৰীসকলে আমাৰ ভনী আৰু নৱজাতক ভতিজাৰ ভালকৈ চোৱাচিতা কৰিলে আৰু উত্তৰ প্ৰদেশৰ তেওঁলোকৰ গৃহ চহৰলৈ যোৱাৰ ব্যৱস্থা কৰি দিছে। নতুন অতিথিৰ আগমনত ভনী আৰু পৰিয়াললৈ অভিনন্দন জনালো।‘’

জিলাখনৰ উপায়ুক্ত প্ৰবীন সিঙে প্ৰবাসী পৰিয়ালটোক ঘৰলৈ পঠিওৱাৰ বাবে এখন গাড়ীৰ ব্যৱস্থা কৰি দিয়াৰ লগতে শিশুটোক কাপোৰ, খোৱাবস্তু আৰু নগদ ৫,০০০ টকা দি পঠিয়ায়।