ইৰাণৰ ওপৰত একেৰাহে দশম নিশা আমেৰিকাৰ আক্ৰমণ! মিত্ৰৰাষ্ট্ৰত আক্ৰমণৰ পিছত ট্ৰাম্পৰ কঠোৰ সকীয়নি

আমেৰিকা যুক্তৰাষ্ট্ৰৰ সেনাই সোমবাৰে একেৰাহে দশমটো নিশাৰ বাবে ইৰাণৰ ওপৰত সামৰিক আক্ৰমণ চলাইছে। এজন আমেৰিকান সেনা নিহত হোৱা আৰু কুৱেইট, জৰ্ডান তথা বাহৰেইনৰ দৰে আমেৰিকাৰ মিত্ৰৰাষ্ট্ৰসমূহৰ ওপৰত তেহৰাণে চলোৱা আক্ৰমণৰ প্ৰত্যুত্তৰত বাণিজ্যিক যাতায়াতৰ বাবে অতি গুৰুত্বপূৰ্ণ হৰমুজ প্ৰণালী পুনৰ মুকলি কৰাৰ উদ্দেশ্যে এই অভিযান তীব্ৰতৰ কৰা হৈছে।

আমেৰিকা যুক্তৰাষ্ট্ৰৰ চেণ্ট্ৰেল কমাণ্ডে সামাজিক মাধ্যমৰ জৰিয়তে প্ৰকাশ কৰা অনুসৰি শেহতীয়া এই আক্ৰমণসমূহৰ মূল লক্ষ্য হৈছে বাণিজ্যিক জাহাজৰ ওপৰত আক্ৰমণ চলাবলৈ ব্যৱহাৰ কৰা ইৰাণৰ সামৰিক ক্ষমতাক দুৰ্বল কৰা। এই সংঘাত বৃদ্ধি পোৱাৰ সময়তে ৰাষ্ট্ৰপতি ডনাল্ড ট্ৰাম্পে আমেৰিকান সেনাৰ ওপৰত হোৱা আক্ৰমণৰ তীব্ৰ প্ৰতিক্ৰিয়া প্ৰকাশ কৰি সামাজিক মাধ্যমত কয় যে যেতিয়াই ইৰাণে এজন আমেৰিকান সেনাক হত্যা কৰিব, তেতিয়াই তেওঁলোকে ইয়াৰ বহুগুণ মূল্য ভৰিব লাগিব। মঙলবাৰে সন্ধিয়া ট্ৰাম্পে ড’ভাৰ এয়াৰ ফ’ৰ্চ বেছত উপস্থিত হৈ নিহত আমেৰিকান সেনাগৰাকীৰ নশ্বৰ দেহ গ্ৰহণ কৰাৰ কথা। ইফালে, আমেৰিকান সেনাই জনোৱা মতে পূৰ্বৰ নিশা চলোৱা আক্ৰমণত ইৰাণৰ সামৰিক কমাণ্ড কেন্দ্ৰ, আকাশী প্ৰতিৰক্ষা আৰু উপকূলীয় নিৰীক্ষণ কেন্দ্ৰ, সামুদ্ৰিক ব্যৱস্থা, ক্ষেপণাস্ত্ৰ আৰু ড্ৰোণ উৎক্ষেপণ কেন্দ্ৰৰ লগতে যোগাযোগ নেটৱৰ্কক লক্ষ্য কৰি লোৱা হৈছিল। ইৰাণৰ চৰকাৰী সংবাদ সংস্থা আই আৰ এন এ-ৰ সূত্ৰ অনুসৰি ইছলামিক ৰিভলিউচনেৰী গাৰ্ড কৰ্পছৰ ভূগৰ্ভস্থ ক্ষেপণাস্ত্ৰ কেন্দ্ৰ থকা বুলি বিশ্বাস কৰা উত্তৰ-পশ্চিমৰ তাব্ৰিজ চহৰৰ সমীপত আমেৰিকাৰ আক্ৰমণত কমেও এজন লোক নিহত হৈছে। যোৱা সপ্তাহতো আমেৰিকান সেনাই ইৰাণৰ এটা বন্দৰৰ দলং আৰু নিৰীক্ষণ টাৱাৰত আক্ৰমণ চলাইছিল। আই আৰ এন এ-য়ে খুজেস্তান প্ৰদেশৰ বন্দৰ ইমাম খোমেইনী, হৰমোজগান প্ৰদেশৰ চিৰিক আৰু জাস্ক, লগতে চিস্তান আৰু বেলুচিস্তান প্ৰদেশৰ কোণাৰক আৰু চাবাহাৰতো আক্ৰমণ হোৱা বুলি প্ৰতিবেদন দাখিল কৰিছে।

এই সংঘাত বৰ্তমান সমগ্ৰ উপসাগৰীয় অঞ্চললৈ বিয়পি পৰিছে। ব্ৰিটিছ সেনাৰ ইউনাইটেড কিংডম মেৰিটাইম ট্ৰেড অপাৰেচনছৰ মতে দেওবাৰে সংযুক্ত আৰৱ আমিৰশ্বাহীৰ সমীপৰ হৰমুজ প্ৰণালীত দ্বিতীয়খন বাণিজ্যিক জাহাজ আক্ৰমণৰ সন্মুখীন হয়। আনহাতে, ওমানৰ উপকূলত প্ৰক্ষেপকৰ আঘাতৰ পিছত আন এখন জাহাজত জুই লাগে আৰু ক্ৰু সদস্যসকলে জাহাজখন এৰি যাবলৈ বাধ্য হয়। ইৰাণে এই সময়ছোৱাত অঞ্চলটোত থকা আমেৰিকাৰ অংশীদাৰ ৰাষ্ট্ৰসমূহকো লক্ষ্য কৰি লৈছে। কুৱেইটে ইৰাণৰ পৰা অহা ধাৰাবাহিক আক্ৰমণ প্ৰতিৰোধ কৰা বুলি জানিবলৈ দিয়াৰ লগতে জৰ্ডানৰ সশস্ত্ৰ বাহিনীয়ে কোনো ক্ষয়ক্ষতি নোহোৱাকৈ তিনিটা ইৰাণীয় ক্ষেপণাস্ত্ৰ ধ্বংস কৰে। একেদৰে, অসামৰিক বিমান পৰিবহনলৈ ভাবুকি কঢ়িয়াই অনা বুলি উল্লেখ কৰি বাহৰেইনে ইৰাণৰ ড্ৰোণ আক্ৰমণক কঠোৰ ভাষাৰে গৰিহণা দিছে।

এই বিবাদৰ ফলত বিশ্বৰ শক্তি যোগান ব্যৱস্থাক লৈও নতুন উদ্বেগৰ সৃষ্টি হৈছে। ইয়েমেনৰ ইৰাণ সমৰ্থিত হাউথি বিদ্ৰোহীসকলে সোমবাৰে চৌদি আৰৱৰ বিৰুদ্ধে সামুদ্ৰিক অৱৰোধ ঘোষণা কৰি লোহিত সাগৰ আৰু এডেন উপসাগৰৰ মাজৰ জাহাজৰ চলাচল বন্ধ কৰিব বুলি জানিবলৈ দিয়ে। যোৱা সপ্তাহত ছানা আন্তঃৰাষ্ট্ৰীয় বিমানবন্দৰত চৌদি আৰৱে চলোৱা বুলি অভিযোগ উঠা আক্ৰমণৰ প্ৰত্যুত্তৰত তেওঁলোকে এই পদক্ষেপ লৈছে। হৰমুজ প্ৰণালী প্ৰায় বন্ধ হৈ পৰাৰ ফলত চৌদি আৰৱে তেল ৰপ্তানি অব্যাহত ৰাখিবলৈ লোহিত সাগৰৰ পাইপলাইনৰ ওপৰত নিৰ্ভৰ কৰিবলগীয়া হৈছে, যদিও ৰিয়াদৰ পৰা এতিয়ালৈকে কোনো তাৎক্ষণিক প্ৰতিক্ৰিয়া প্ৰকাশ পোৱা নাই। সংঘাতৰ ফলত শেহতীয়া সপ্তাহবোৰত খাৰুৱা তেলৰ মূল্য বৃদ্ধি পাইছে আৰু সোমবাৰে ব্ৰেণ্ট ক্ৰুডৰ মূল্য প্ৰতি বেৰেলত ৮৮ ডলাৰৰ ওপৰত বিক্ৰী হৈছে। আমেৰিকান সেনাই লগতে কয় যে ইৰাণৰ তেল ৰপ্তানি সীমিত কৰাৰ উদ্দেশ্যে নৌ অৱৰোধ পুনৰ আৰোপ কৰাৰ পিছত তেওঁলোকে সাতখন জাহাজৰ পথ সলনি কৰিছে আৰু এখন জাহাজ অচল কৰি দিছে।

যোৱা মাহত স্বাক্ষৰিত হোৱা অস্থায়ী যুদ্ধবিৰতি চুক্তিখন কাৰ্যতঃ ব্যৰ্থ হোৱাৰ ফলত হৰমুজ প্ৰণালীৰে জাহাজৰ চলাচল স্থবিৰ হৈ পৰিছে। তথাপিও, ধাৰাবাহিক আক্ৰমণ-প্ৰত্যাক্ৰমণৰ মাজতে কিছু কূটনৈতিক তৎপৰতাও পৰিলক্ষিত হৈছে। ৱাশ্বিংটন আৰু তেহৰাণৰ মাজত মধ্যস্থতাকাৰীৰ ভূমিকা পালন কৰি অহা পাকিস্তানলৈ ইৰাণৰ গৃহমন্ত্ৰীয়ে কৰা ভ্ৰমণে পৰিস্থিতি শান্ত কৰাৰ এক ক্ষীণ আশা কঢ়িয়াই আনিছে। পৰৱৰ্তী সময়ত এই কূটনৈতিক পদক্ষেপে অঞ্চলটোত শান্তি ঘূৰাই অনাৰ লগতে বাণিজ্যিক যাতায়াত স্বাভাৱিক কৰিব পাৰিব নে নাই, সেয়া এতিয়া লক্ষণীয় হৈ পৰিছে।