লাউডস্পীকাৰ বিতৰ্ক: ধৰ্মীয়স্থলীৰ পৰা ৪৫,৭৭৩ টা লাউডস্পীকাৰ আঁতৰালে উত্তৰ প্ৰদেশ আৰক্ষীয়ে
দেশত এতিয়া ব্যাপক হাৰত চৰ্চা হৈ আছে মছজিদকে ধৰি আন ধৰ্মীয়স্থলীত লাউডস্পীকাৰ ব্যৱহাৰ নিষিদ্ধ কৰাৰ বিষয়টোকলৈ।
শব্দ প্ৰদূষণৰ দোহাই দি বহুতে ধৰ্মীয় স্থলীত লাউডস্পীকাৰ নিষিদ্ধ কৰাৰ দাবী জনাইছে।
কিছু কিছু ৰাজ্যত ৰাজনৈতিক উদ্দেশ্য আগত ৰাখিও এনে দাবী উত্থাপন হৈছে।
ইয়াৰ মাজতে উত্তৰ প্ৰদেশৰ মুখ্যমন্ত্ৰী যোগী আদিত্যনাথে মন্দিৰ, মছজিদ আদি সকলো ধৰ্মীয় স্থলীৰ পৰাই লাউডস্পীকাৰ আঁতৰ কৰাৰ নিৰ্দেশ দি এক আদৰ্শ গঢ়িছে।
মুখ্যমন্ত্ৰীৰ আদেশ মৰ্মে উত্তৰ প্ৰদেশ আৰক্ষীয়ে আজি ৰাজ্যখনৰ বিভিন্ন ধৰ্মীয় স্থানৰ পৰা প্ৰায় ৪৫,৭৭৩ টা লাউডস্পীকাৰ আঁতৰ কৰে। উত্তৰ প্ৰদেশ আৰক্ষীৰ এক শীৰ্ষ সূত্ৰই এই কথা প্ৰকাশ কৰিছে।
উত্তৰ প্ৰদেশৰ অতিৰিক্ত আৰক্ষী সঞ্চালক প্ৰধান (আইন-শৃংখলা) প্ৰশান্ত কুমাৰে এই প্ৰসংগত সংবাদমাধ্যমৰ আগত কয়, “এতিয়ালৈকে ৰাজ্যখনৰ বিভিন্ন ধৰ্মীয় স্থানৰ পৰা ৪৫,৭৭৩ টা লাউডস্পীকাৰ আঁতৰ কৰা হৈছে। ৫৮,৮৬১ টা লাউডস্পীকাৰৰ শব্দৰ প্ৰাবল্য হ্ৰাস কৰা হৈছে। “
উত্তৰ প্ৰদেশ চৰকাৰে ধৰ্মীয় স্থানৰ পৰা লাউডস্পীকাৰ আঁতৰাবলৈ নিৰ্দেশ দিয়াৰ কেইদিনমান পিছত ৰাজ্য খনৰ আৰক্ষীয়ে এনে ব্যৱস্থা গ্ৰহণ কৰিছে। উত্তৰ প্ৰদেশৰ মুখ্যমন্ত্ৰী যোগী আদিত্যনাথে এই মাহৰ আৰম্ভণিতে ধৰ্মীয় স্থানসমূহত লাউডস্পীকাৰৰ পৰিমাণ সীমিত কৰাৰ বাবে নিৰ্দেশনা জাৰি কৰিছিল।
অতিৰিক্ত মুখ্য সচিব (গৃহ) অৱনীশ অৱস্থীয়ে মুখ্যমন্ত্ৰীৰ পৰা নিৰ্দেশ পোৱাৰ পিছতে ৰাজ্য খনৰ জিলা উপায়ুক্তসকলক ব্যৱস্থা গ্ৰহণৰ নিৰ্দেশ দিছিল।