শিৱসাগৰত পুলৱামাৰ চহিদলৈ শ্ৰদ্ধাঞ্জলি বিভিন্ন দল-সংগঠনৰ

জম্মু-কাশ্মীৰৰ পুলৱামাত ১৪ ফেব্ৰুৱাৰীত সংঘটিত সন্ত্ৰাসবাদীৰ আত্মঘাটী বোমা বিস্ফোৰণত নিহত চি আৰ পি এফৰ ৪৪ জন বীৰ চহিদৰ প্ৰতি শ্ৰদ্ধাঞ্জলি জ্ঞাপন কৰাৰ লগতে আঘাতপ্ৰাপ্ত জোৱানসকলৰ আশু আৰোগ্য কামনাৰে শিৱসাগৰত বিভিন্ন দল-সংগঠনে বন্তি প্ৰজ্বলন কৰে।

আটাছু শিৱসাগৰ জিলা, মহকুমা আৰু নগৰ সমিতিয়ে ষ্টেচন চাৰিআলিত বন্তি প্ৰজ্বলন কৰি চহিদলৈ শ্ৰদ্ধা নিবেদন কৰে। আনহাতে শিৱসাগৰ জিলা আৰু আঞ্চলিক ছাত্ৰ সন্থাই ব’ৰ্ডিং ৰোডত থকা আছুৰ কাৰ্যালয়ৰ সন্মুখত, সংগ্ৰামী যুৱ ছাত্ৰ পৰিষদে দ’লমুখ চাৰিআলিত,ঐক্য সেনাৰ শিৱসাগৰ জিলা সমিতিয়ে দ’লমুখ  চাৰিআলিস্থিত  ড০ ভূপেন হাজৰিকাৰ প্ৰতিমূৰ্তিৰ সন্মুখত, ঐক্য সেনা নামতি চাৰিআলি আঞ্চলিকে নামতি চাৰিআলিত চহিদ সকললৈ শ্ৰদ্ধাঞ্জলি জ্ঞাপন কৰে।

কেন্দ্ৰীয় বজাৰ ব্যৱসায়ীসকলে লক্ষী চিনেমা হলৰ সন্মুখত, থানামুখ জিজ্ঞাসা বয়’জ ক্লাৱে থানামুখত, অসম ছাত্ৰ যুৱ সন্মিলন, সদৌ অসম উন্নয়ণ পৰিষদ, ৰংপুৰ জ্যোতি ক্লাৱ, ষ্টেচন চাৰিআলি ব্যৱসায়ী সন্থা, ষ্টেচন চাৰি আলি যুৱ জামাত নতুন বজাৰ ব্যৱসায়ী সন্থাই ষ্টেচন চাৰিআলিত বন্তি প্ৰজ্বলন কাৰ্য্যসূচী ৰূপায়ণ কৰে।

মাৰোৱাৰী পঞ্চায়ত জন দাতব্য সমিতি, মাৰোৱাৰী যুৱ মঞ্চ আৰু মহেশ্বৰী সভাই মুক্তিনাথ চাৰি আলিৰ বৰাট জুৱেলাৰীৰ সন্মুখত বীৰ চহিদসকলৰ আত্মাৰ চিৰ শান্তি প্ৰাৰ্থনাৰে বন্তি প্ৰজ্বলন কৰে।

আনহাতে,বিজেপিৰ শিৱসাগৰ জিলা সমিতি আৰু আমুগুৰি কংগ্ৰেছ কমিটিয়েও বন্তি প্ৰজ্বলন কৰি বীৰ চহিদলৈ শ্ৰদ্ধা নিবেদন কৰে।

উল্লেখযোগ্য যে, হিন্দুস্তান নিৰ্মাণ দল আৰু ৰাষ্ট্ৰীয় বজৰং দলৰ শিৱসাগৰ জিলা সমিতিয়ে দ’লমুখ চাৰিআলিত পাকিস্তানৰ পতকা দাহ কৰি শীঘ্ৰে সন্ত্ৰাসবাদ আৰু পাকিস্তানৰ বিপক্ষে কঠোৰ পদক্ষেপ লোৱাৰ বাবে চৰকাৰক দাবী জনায়।