চীনৰ বিৰুদ্ধে যুঁজিবলৈ প্ৰস্তুত ভাৰতীয় সেনা : প্রতিৰক্ষা সম্পৰ্কীয় সংসদীয় কমিটিক জনালে সেনা প্ৰধানে

চীনৰ সৈতে সীমান্ত বিবাদ তথা উত্তেজনা সাময়িক ভাৱে স্তিমিত হ’লেও চীনৰ বিৰুদ্ধে এখন দীঘলীয়া যুদ্ধৰ বাবে প্ৰস্তুত বুলি জনাইছে ভাৰতীয় সেনাই।

উল্লেখ্য যে, চীনে লাডাখ সীমান্তৰ পৰা সৈন্য প্ৰত্যাহাৰ কৰা নাই বুলি ভাৰতে প্ৰায়ে অভিযোগ তুলি আহিছে।

ইপিনে পাংগং হ্ৰদৰ ফিঙ্গাৰ পইণ্ট আৰু দেপচাং উপত্যকাৰ পৰা চীনে সেনা প্ৰত্যাহাৰ কৰিবলৈ অমান্তি হৈছে।

চীনৰ দাবী যে উক্ত অঞ্চলসমূহ চীনৰ ভূখণ্ডৰ ভিতৰত পৰে।

এনে বিবাদৰ পৰিপ্ৰেক্ষিত যুদ্ধৰ দ্বাৰাহে উক্ত অঞ্চলসমূহৰ পৰা পিপ’লছ লিবাৰেশ্যন আৰ্মিক উৎখাট কৰাতো সম্ভৱ বুলি ভাৰতে ভাবিছে।

তেনে সময়তে চিফ অৱ ডিফেন্স ষ্টাফ বিপিন ৰাৱাটৰ নেতৃত্বত সেনাৰ শীৰ্ষ বিষয়াই প্ৰতিৰক্ষা বিষয়ক সংসদীয় সমিতিক জনাইছে যে লাডাখৰ চীন সীমান্তৰ পৰা সেনা প্ৰত্যাহাৰ সম্পূৰ্ণ হ’বলৈ কিছু সময় লাগিব।

যদি কোনো অপ্ৰীতিকৰ পৰিস্থিতিৰ সৃষ্টি হয় বা চীনৰ বিৰুদ্ধে দীঘলীয়া যুদ্ধৰ প্ৰয়োজন হয়, তাৰবাবে ভাৰতীয় সেনা সম্পূৰ্ণ প্ৰস্তুত হৈ আছে বুলিও সেনাৰ শীৰ্ষ বিষয়াই সংসদীয় সমিতিক অৱগত কৰিছে।

সেনাৰ শীর্ষ বিষয়াসকলে প্ৰতিৰক্ষা সম্পৰ্কীয় সংসদীয় সমিতিক শীত কালৰ বিপদজ্জনক পৰিস্থিতিটো ভাৰতীয় সেনা যুদ্ধ কৰিব পৰাকৈ সাজু হৈ উঠিছে বুলি জনাইছে।

উল্লেখ্য যে, শীত কালত লাডাখৰ তাপমাত্ৰা শূণ্য ডিগ্ৰীতকৈ তললৈ নামে। তেনে অৱস্থাত লাডাখত সৈন্য বাহিনীয়ে যুদ্ধ কৰাতো বাদেই টহলদাৰী কাম কৰাটোও অতি কষ্টকৰ হৈ পৰে।

তেনে অৱস্থাতো সেনা বাহিনীৰ শীৰ্ষ বিষয়াই সংসদীয় সমিতিক ভাৰতীয় সেনা দীৰ্ঘকালীন যুদ্ধৰ বাবে প্ৰস্তুত বুলি কোৱাটো অতি তাৎপৰ্যপূৰ্ণ বুলি বিবেচিত হৈছে।

ইপিনে স্থলসেনা প্ৰধান মনোজ মুকুন্দ নাৰভানে সেনা কামাণ্ডাৰসকলক সকলো ধৰণৰ যুদ্ধৰ অনুশীলন অব্যাহত ৰাখিবলৈ নিৰ্দেশ দিছে বুলি জানিব পৰা গৈছে।