কাজিৰঙাত বনৰীয়া ম’হৰ আক্ৰমণত ১জন নিহত, আন ১গৰাকী গুৰুতৰভাৱে আহত

কাজিৰঙা ৰাষ্ট্ৰীয় উদ্যানৰ পৰা ওলাই অহা এটা বনৰীয়া ম’হে আক্ৰমণ কৰি মঙলবাৰে লক্ষীৰাম ঘাতোৱাল নামৰ এজন কৃষকক হত্যা কৰাৰ লগতে মণি চাৰ’ নামৰ যুৱতী এগৰাকীও ম’হৰ আক্ৰমণত আহত হৈছে।

প্ৰাপ্ত তথ্য মতে কাজিৰঙা ৰাষ্ট্ৰীয় উদ্যানৰ বাগৰি বনাঞ্চলৰ অধীনৰ কুঠৰী গাওঁ পঞ্চায়ত এলেকাৰ গোহাঁই গাঁৱত মঙলবাৰে দিনৰ প্ৰায় ২ বজাত উদ্যানখনৰ পৰা ওলাই অহা এটা প্ৰকাণ্ড বনৰীয়া ম’হে পথাৰলৈ কাম কৰিবলৈ যোৱা গাওঁখনৰ লক্ষীৰাম ঘাটোৱাল নামৰ লোকজনক উপৰ্যুপৰি আক্ৰমণ কৰি গুৰুতৰভাৱে আহত কৰে। আহত লোকজনক চিকিৎসালয়লৈ নিয়া হৈছিল যদিও চিকিৎসকে তেওঁক মৃত বুলি ঘোষণা কৰে।

ৰাইজে বনৰীয়া ম’হটোক গুলীয়াই মাৰিবলৈ দাবী জনাইছিল যদিও অৱশ্যে বন বিভাগৰ লোকে আক্ৰমণকাৰী ম’হটোক খেদি উদ্যানৰ ভিতৰলৈ নিবলৈ সক্ষম হয়।

ম’হৰ আক্ৰমণত মৃত্যু হোৱা ঘাতোৱালৰ পৰিয়ালক উচিত ক্ষতিপূৰণ দিবলৈ বন বিভাগক ৰাইজে দাবী জনাইছে।

ইফালে উদ্যানখনৰ অগৰাতলি বনাঞ্চলৰ সীমাতে থকা মাজ চাপৰিতো মঙলবাৰেই মণি চাৰ’ নামৰ এগৰাকী নৱ বিবাহিতা যুৱতীও বনৰীয়া ম’হৰ আক্ৰমণত গুৰুতৰভাৱে আহত হৈছে৷ জানিব পৰা মতে মাজ চপৰিত সমনীয়াৰ সৈতে ঝাও বনৰ খৰি সংগ্ৰহৰ বাবে যোৱা যুৱতীগৰাকীৰ লগৰীয়াসকল পলাই সাৰে যদিও চাৰ’ ম’হৰ আক্ৰমণত অতি বেয়াকৈ আহত হয়৷

পাচত চাৰ’ক সমীপৰ ধনশিৰি ইক’ কেম্পৰ গাড়ীৰে বোকাখাত অসামৰিক চিকিৎসালয়লৈ নিয়া হয় যদিও আঘাত গুৰুতৰ হোৱা বাবে তেওঁক যোৰহাট চিকিৎসা মহাবিদ্যালয় হস্পিটেললৈ প্ৰেৰণ কৰা হয়৷

চাৰ’ৰ ঘৰ মাজ চাপৰিৰ সমীপৰে ধানবাৰীৰ চাৰ’ গাঁৱত৷