জাগুনত বনৰীয়া হাতীৰ উপদ্ৰৱ; ৩টা বাসগৃহ লণ্ড-ভণ্ড

তিনিচুকীয়া জিলাৰ মাৰ্ঘেৰিটা মহকুমাৰ জাগুনত বিগত ৩-৪ মাহ ধৰি বনৰীয়া হাতীৰ উপদ্ৰৱত ৰাইজে বিনিদ্ৰ ৰজনী কটোৱাৰ সময়তে আজি পুৱা জাগুনৰ ২নং আহোম পথাৰ গাঁৱত বনৰীয়া হাতীয়ে সন্ত্ৰাস সৃষ্টি কৰি তিনিটাকৈ বাসগৃহ ভাঙি লণ্ড-ভণ্ড কৰে।

প্ৰাপ্ত তথ্য মতে কঠা সংৰক্ষিত বনাঞ্চলৰ পৰা খাদ্যৰ সন্ধানত ওলাই অহা এটা বনৰীয়া হাতীৰ দলে ২নং আহোম পথাৰ গাঁৱৰ শ্যাম ওৰাং, ৰাজেন দত্ত আৰু তুলু খাৰিয়া নামৰ লোককেইজনৰ বাসগৃহত তাণ্ডৱ চলায়। ভুক্তভোগী লোককেইজনে অনতিপলমে বন-বিভাগৰ পৰা ক্ষতিপূৰণৰ দাবী কৰিছে।

উল্লেখযোগ্য যে একাংশ চোৰাং কাঠ মাফিয়াই কঠা সংৰক্ষিত বনাঞ্চলত এফালৰ পৰা ধ্বংস কাৰ্য চলাই অহাৰ ফলত খাদ্যৰ সন্ধানত বনৰীয়া হাতীয়ে বনাঞ্চলৰ বাহিৰলৈ ওলাই আহিব লগীয়া হৈছে। যাৰ বাবে অঞ্চলটোত দিনক-দিনে হাতী-মানুহৰ সংঘাত বৃদ্ধি পাব ধৰিছে।

এইক্ষেত্ৰত প্ৰকৃতিপ্ৰেমী সংগঠন আৰু সচেতন ৰাইজে বন-বিভাগক বিহিত ব্যৱস্থা গ্ৰহণৰ দাবী জনাই আহিছে যদিও প্ৰশাসন তথা বন বিভাগৰ ফালৰ পৰা কোনো ব্যৱস্থা লোৱা পৰিলক্ষিত হোৱা নাই।