চিৰাঙত বনৰীয়া হাতীৰ আক্ৰমণত ১৭ বছৰীয়া যুৱকৰ মৃত্যু

চিৰাং জিলাৰ পানবাৰী থানাৰ অন্তৰ্গত ২ নং লক্ষীঝোৰত বৃহস্পতিবাৰে বনৰীয়া হাতীৰ আক্ৰমণত বশিষ্ট নমঃ দাস নামৰ এগৰাকী সোতৰ বছৰীয়া যুৱকৰ মৃত্যু হয়।

বনৰীয়া হাতীৰ আক্ৰমণত প্ৰাণ হেৰুওৱা দুৰ্ভগীয়া বশিষ্ট নমঃ দাস ২ নং লক্ষীঝোৰৰ সম্ভু দাসৰ পুত্ৰ।

জানিব পৰা মতে, বৃহস্পতিবাৰে তিনিজন বন্ধুৰ সৈতে বিষ্ণুপুৰ বজাৰৰ পৰা ঘৰলৈ উভতি অহাৰ সময়তে মানাহ ৰাষ্ট্ৰীয় উদ্যানৰ পৰা খাদ্যৰ সন্ধানত ওলাই অহা বনৰীয়া হাতীৰ এটা জাকৰ মুখামুখি হয় বশিষ্ঠ।

হাতীৰ জাকটোৰ সন্মুখৰ পৰা লগত অহা তিনিজন বন্ধুৱে কোনোমতে পলাই সাৰিবলৈ সক্ষম হয় যদিও হাতীৰ আক্ৰমণত গুৰুতৰভাৱে আহত হয় সোতৰ বছৰীয়া বশিষ্ঠ।

আঘাতপ্ৰাপ্ত যুৱকজনক স্থানীয় ৰাইজে ততাতৈয়াকৈ চিকিৎসালয়লৈ লৈ যায় যদিও চিকিৎসকে যুৱকজনক মৃত ঘোষণা কৰে।

উল্লেখযোগ্য যে, চিৰাং জিলাৰ বিভিন্ন অঞ্চলত দীৰ্ঘদিন ধৰি বনৰীয়া হাতীৰ উপদ্ৰৱ অব্যাহত আছে। প্ৰায়ে জিলাখনৰ বিভিন্ন অঞ্চলত বনৰীয়া হাতীয়ে প্ৰবেশ কৰি মানুহৰ ঘৰ সম্পত্তি নষ্ট কৰে যদিও এইক্ষেত্ৰত ৰাইজক সুৰক্ষা প্ৰদানত ব্যৰ্থ হৈছে ৰাজ্যৰ বন বিভাগ।