এবাৰ দুবাৰ নহয়, ৯ বাৰ বিয়া পাতি ধন-সম্পত্তি লৈ উধাও এই মহিলা

অবিবাহিত যুৱকসকলক লক্ষ্য কৰি বিয়াৰ নামত প্ৰৱঞ্চনা কৰা এটা ডাঙৰ চক্ৰৰ তথ্য শেহতীয়াকৈ পোহৰলৈ আহিছে। মহাৰাষ্ট্ৰৰ বীড জিলাত সংঘটিত এই ঘটনাই এতিয়া সকলোকে আচৰিত কৰি তুলিছে। এগৰাকী মহিলাই এজন নহয়, দুজন নহয়, একেৰাহে ৯ জনকৈ যুৱকক বিয়াৰ জালত পেলাই তেওঁলোকৰ পৰা নগদ ধন আৰু সোণৰ অলংকাৰ লুটি লৈ পলায়ন কৰিছে। আৰক্ষীৰ মতে এই সমগ্ৰ ঘটনাৰ আঁৰত এটা সক্ৰিয় চক্ৰ আছে যিয়ে ভুৱা বিয়াৰ নাটক ৰচনা কৰি মানুহক ঠগি আহিছে।

এই প্ৰৱঞ্চনাৰ চিকাৰ হোৱা শেহতীয়া লোকজন হৈছে বীড জিলাৰে এখন গাঁৱৰ যোগেশ শিন্দে নামৰ এজন যুৱক। যোগেশৰ অভিযোগ অনুসৰি, কিছুমান দালালে তেওঁৰ সৈতে সেই মহিলাগৰাকীৰ চিনাকি কৰাই দিছিল। বিয়াৰ বিনিময়ত দালালসকলে তেওঁৰ পৰা বুজন পৰিমাণৰ ধন সংগ্ৰহ কৰিছিল। বিয়াৰ কেইদিনমানৰ পিছতে নতুনকৈ অহা কইনাগৰাকী আৰু সেই দালালকেইজন হঠাৎ নোহোৱা হৈ পৰে।

তাৰ পিছতে যোগেশে যেতিয়া বিচাৰ-খোচাৰ কৰে, তেতিয়া তেওঁ জানিব পাৰে যে সেই একেগৰাকী মহিলাই ইয়াৰ পূৰ্বেও কমেও আঠজনকৈ লোকক একেদৰে বিয়া কৰি তেওঁলোকৰ পৰা ধন আৰু অলংকাৰ লুটি লৈ পলাই গৈছিল। বিয়াৰ আগতে যোগেশে এই সকলোবোৰ কথা একেবাৰেই গম পোৱা নাছিল। আৰক্ষীৰ মতে এই চক্ৰটোৱে সাধাৰণতে বিয়া হোৱা নাই বা বিয়াৰ বাবে ছোৱালী বিচাৰি থকা যুৱকসকলক লক্ষ্য হিচাপে লৈ লয়। এতিয়া আৰক্ষীয়ে সমগ্ৰ ঘটনাৰ তদন্ত আৰম্ভ কৰিছে আৰু সেই প্ৰৱঞ্চক মহিলাগৰাকীৰ লগতে তেওঁৰ সহযোগী দালালসকলক ধৰিবলৈ অভিযান চলাইছে।