একবিংশ শতিকাত শিক্ষাৰ প্ৰত্যাহ্বান আৰু ইয়াৰ সমাধান সন্দৰ্ভত তামুলপুৰত কৰ্মশালা
সৰ্বশিক্ষা মিছন অভিযান, বাক্সা জিলা, টাটা ইনষ্টিটিউট অব ছ’চিয়েল ছাইন্স, মুম্বাই আৰু গ্ৰাম্য বিকাশ মঞ্চ, নলবাৰীৰ উদ্যোগত ১৯ আৰু ২০ নৱেম্বৰত দুদিনীয়া কাৰ্যসূচীৰে তামুলপুৰ উচ্চতৰ মাধ্যমিক বিদ্যালয়ৰ প্ৰেক্ষাগৃহত শিক্ষাৰ ক্ষেত্ৰত প্ৰযুক্তিবিদ্যাৰ সংহতি (আই চি টি) বিষয়ত এক প্ৰশিক্ষণ কৰ্মশালা অনুষ্ঠিত হয়।
১৯ নৱেম্বৰৰ পুৱা তামুলপুৰ উচ্চতৰ মাধ্যমিক বিদ্যালয়ৰ অধ্যক্ষ বিভূতি ডেকাই শুভাৰম্ভ কৰা প্ৰশিক্ষণ কৰ্মশালাত অতুল নার্জাৰী, যোগেন চন্দ্ৰ ৰাজবংশী, প্ৰণৱ দত্ত আৰু জ্যোতি প্ৰকাশ তালুকদাৰ প্ৰশিক্ষক হিচাপে উপস্থিত থাকে।
প্ৰথম দিনাৰ কাৰ্যসূচীত শিক্ষকসকলক একবিংশ শতিকাৰ শিক্ষাৰ প্ৰত্যাহ্বান আৰু ইয়াৰ সমাধানৰ ওপৰত প্ৰশিক্ষণ দিয়াৰ লগতে দ্বিতীয় দিনা শ্ৰেণীত পাঠ পৰিকল্পনা উপস্থাপন, প্ৰকল্প প্ৰণয়ন উপস্থাপনৰ ওপৰত প্ৰশিক্ষণ দিয়া হয়।
আজিৰ কাৰ্যসূচীত নিৰীক্ষক হিচাপে উপস্থিত থাকে সৰ্বশিক্ষা অভিযান মিছন, বাক্সা জিলাৰ আঁচনি বিষয়া সীতাংগ ডেকা। বুবুল পাঠকৰ সৌজন্যত অনুষ্ঠিত প্ৰশিক্ষণ কৰ্মশালাটো চলাই নিয়াত বিশেষভাৱে সহায় সহযোগ কৰে তামুলপুৰ শিক্ষাখণ্ডৰ কৰ্মচাৰী হেমেন কলিতা, তিলক ৰাজবংশী আৰু দিবাকৰ বৈশ্যই।
আজি আবেলি ৩.৩০ বজাত সামৰণি পৰা দুদিনীয়া প্ৰশিক্ষণ কৰ্মশালাটোত ২১খন বিদ্যালয়ৰ পৰা অহা ৪২ গৰাকী শিক্ষক-শিক্ষয়িত্ৰীয়ে অংশগ্ৰহণ কৰে।