মুখ্য মন্ত্ৰীৰ বান সাহায্য পুঁজিলৈ ১ লাখ টকাৰ বৰঙণি যুৱ ক্ৰিকেটাৰ ৰিয়ান পৰাগৰ

চলিত ইণ্ডিয়ান প্ৰিমিয়াৰ লীগত ৰাজস্থান ৰোয়েলছৰ হৈ খেলি দৰ্শনীয় প্ৰদৰ্শন দাঙি ধৰা ভাৰতৰ উদীয়মান ক্ৰিকেটাৰ তথা অসম সন্তান ৰিয়ান পৰাগে মুখ্য মন্ত্ৰী বান সাহায্য পুঁজিলৈ ১ লাখ টকা বৰঙণি হিচাপে আগবঢ়ায়।

মুখ্য মন্ত্ৰী সৰ্বানন্দ সোণোৱালে ছ’চিয়েল মিডিয়াত ৰিয়ান পৰাগে সাহায্য দান কৰা ফটো শ্বেয়াৰ কৰি বানাক্ৰান্ত ৰাইজৰ সহায়ৰ বাবে যুৱপ্ৰজন্মই উদ্যমেৰে আগবাঢ়ি আহি সমাজলৈ এক ইতিবাচক বাৰ্তা কঢ়িয়াই আনিছে বুলি উল্লেখ কৰি ৰিয়ানক ধন্যবাদ জ্ঞাপন কৰে।

Thank you @ParagRiyan for your contribution of ₹ 1 Lakh to the Chief Minister's Relief Fund.

It is heartening to see the young generation coming forward in large numbers to help those affected during #AssamFloods. pic.twitter.com/8HcAOa8iih

— Sarbananda Sonowal (@sarbanandsonwal) July 20, 2019

ৰিয়ান পৰাগৰ উপৰিও বিশিষ্ট অসমীয়া চলচ্চিত্ৰ নিৰ্মাতা তথা পৰিচালক ৰীমা দাসেও মুখ্য মন্ত্ৰী বান সাহায্য পুঁজিলৈ ১ লাখ টকাৰ বৰঙণি আগবঢ়াইছিল।

ভাৰতৰ তাৰকা দৌৰবিদ তথা আন এগৰাকী সুযোগ্য অসম সন্তান হিমা দাসেও নিজৰ আধা মাহৰ দৰমহা মুখ্য মন্ত্ৰীৰ বান সাহায্য পুঁজিলৈ দান কৰে।

অসম দলৰ প্ৰাক্তন ৰঞ্জী ক্ৰিকেটাৰ পৰাগ দাস আৰু সাঁতোৰ বিদ মিঠু বৰুৱাৰ পুত্ৰ ৰিয়ান পৰাগে চলিত আই পি এলত ৰাজস্থান ৰোয়েলছৰ হৈ অভিষেক ঘটাই আই পি এলৰ ইতিহাসত অৰ্ধ শতৰাণ কৰা সৰ্বকনিষ্ঠ খেলুৱৈ ৰূপে পৰিগণিত হৈছিল।

উল্লেখযোগ্য যে, চলিত বৰ্ষৰ বানপানীয়ে অসমত ভয়াবহ ৰূপ ধাৰণ কৰি ২৮ খন জিলা জলমগ্ন কৰাৰ লগতে বানপানীৰ ফলত প্ৰায় ২৬ লাখৰো অধিক লোক ক্ষতিগ্ৰস্ত হয়।