প্ৰাক্তন প্ৰেমিকাৰ অশ্লীল ফটো আৰু ফ’ন নম্বৰ ফেইচবুকত আপল’ড কৰি ৰঙাঘৰৰ আলহী হ’ল যুৱক
ছ’চিয়েল মেডিয়া ফেইচবুকত এগৰাকী যুৱতীৰ ফটো আৰু ফ’ন নম্বৰ ৰাজহুৱা কৰি ৰঙাঘৰৰ আলহী হ’ল দুলীয়াজানৰ ৰোহিত শৰ্মা নামৰ এজন যুৱক।
যুৱতীগৰাকীৰ অভিযোগৰ ভিত্তিত আৰক্ষীয়ে বেংগালুৰুৰ পৰা যুৱকজনক গ্ৰেপ্তাৰ কৰে। ৰোহিতে তাত এটা কোম্পানিত কাম কৰি আছিল। কালি অসমলৈ অনা ৰোহিতক আজি আৰক্ষীয়ে আদালতত হাজিৰ কৰায়।
আৰক্ষী সূত্ৰই জনোৱা অনুসৰি দুলীয়াজানৰ আনন্দপুৰ থাপাবস্তিৰ লক্ষণ শৰ্মাৰ পুত্ৰ ৰোহিতে যোৱা আগষ্ট মাহত ডিব্ৰুগড়ৰ এগৰাকী যুৱতীৰ আপত্তিকৰ ফটো আৰু ফ’ন নম্বৰ ফেইচবুকৰ জৰিয়তে আপল’ড কৰিছিল।
চানমাৰি আৰক্ষী থানাৰ ভাৰপ্ৰাপ্ত আৰক্ষী বিষয়া বীৰেন ডেকাই নৰ্থ-ইষ্ট নাওক জানিবলৈ দিয়ে। ডেকাই জনোৱা মতে চাৰি বছৰ পূৰ্বে ভুক্তভোগী যুৱতীৰ সৈতে প্ৰেমৰ সম্পৰ্ক আছিল ৰোহিতৰ।
যুৱতীগৰাকীয়ে যোৱা ৭ আগষ্টত চানমাৰি আৰক্ষী থানাত ৰোহিতৰ বিৰুদ্ধে দিয়া গোচৰৰ ভিত্তিত আৰক্ষীয়ে ভাৰতীয় দণ্ডবিধিৰ ২৯৪/৫০৭ নং ধাৰাত ৭২৫/১৮ নম্বৰত এক গোচৰ ৰুজু কৰে। আই টি আইন, ২০০০ -অৰ অধীনত ৬৬/৬৭ নং ধাৰাত এটা গোচৰ ৰুজু কৰি যুৱকজনৰ বিৰুদ্ধে তদন্ত আৰম্ভ কৰিছিল।
অৱশেষত চানমাৰি আৰক্ষীয়ে অভিযান চলাই যোৱা ২০ নৱেম্বৰত বেংগালুৰুৰ পৰা ৰোহিতক গ্ৰেপ্তাৰ কৰি কালি চানমাৰি থানালৈ আনে। শুকুৰবাৰে আদালতত হাজিৰ কৰোৱাৰ পিছত ৰোহিতক বিয়লি ৩ বজাত চানমাৰি আৰক্ষীয়ে ধৃত ৰোহিতক জেইললৈ প্ৰেৰণ কৰে।
প্ৰাক্তন প্ৰেমিকাৰ বিৰুদ্ধে টকা লোৱাৰ অভিযোগ আনিলে ৰোহিতে
আনহাতে, ধৃত ৰোহিতে নৰ্থ-ইষ্ট নাওৰ আগত দিয়া ভাষ্য অনুসৰি যুৱতীগৰাকীয়ে তেওঁৰ পৰা প্ৰেমৰ ছলনাৰে বহুত টকা সৰকালে। “তাই মোৰ পৰা পইচা খাই থৈছিল। ইম’শ্য’নেল ব্লেকমেইলিং কৰি তাই মোৰ পৰা বহু পইচা খালে।”
প্ৰেমৰ সম্পৰ্ক ছিন্ন হোৱাৰ কথাও ক’লে ৰোহিতে। “আগতে ভালপোৱা সম্পৰ্ক আছিল যদিও এতিয়া নাই।”
আনহাতে অশ্লীল ফটো নহয়, সাধাৰণ ফটোহে আপল’ড কৰা বুলি দাবী কৰে ৰোহিতে। “মই তাইৰ সাধাৰণ এখন ফটো দিছিলো। ফটোৰ লগতে তাইৰ ফ’ন নম্বৰ দিছিলো। মাৰ একাউণ্টৰ পৰাও ৬-৭ লাখ টকা দিছিলো তাইক। তাই এতিয়া বেলেগ ক্ৰেডিট কাৰ্ড পালে চাগে।” ৰোহিতৰ ভাষ্য।