প্ৰধান মন্ত্ৰী মোদী, হিমন্ত বিশ্বক ফেইচবুকত হত্যাৰ ভাবুকি দিয়া যুৱকক গ্ৰেপ্তাৰ

দেশৰ প্ৰধান মন্ত্ৰী নৰেন্দ্ৰ মোদী আৰু ৰাজ্যৰ স্বাস্থ্য মন্ত্ৰী হিমন্ত বিশ্ব শৰ্মাক ফেইচবুকৰ জৰিয়তে হত্যাৰ ভাবুকি প্ৰদান কৰা এজন যুৱকক আজি অসম আৰক্ষীয়ে নলবাৰীৰ পৰা গ্ৰেপ্তাৰ কৰে।

নলবাৰী জিলাৰ বৰভাগৰ নিবাসী এই যুৱকজনৰ নাম লিণ্টু কিশোৰ শৰ্মা বুলি জানিব পৰা গৈছে।

যোৱা ১৫ ছেপ্তেম্বৰত কিশোৰ শৰ্মাই নিজৰ ফেইচবুকৰ টাইমলাইনত এটা ষ্টেটাছৰ জৰিয়তে মন্ত্ৰী হিমন্ত বিশ্ব শৰ্মাই ২০২১ৰ নিৰ্বাচনী সভাত মৃত্যুবৰণ কৰিব বুলি ভৱিষ্যতবাণী কৰিছিল।

নিজৰ প’ষ্টত তেওঁ লিখিছিল, ‘সেইদিনা অসমৰ গুৱাহাটী মহানগৰীত ভাৰতৰ প্রধান মন্ত্ৰী নৰেন্দ্র মোদীৰ বিশাল জনসভা হ’ব। উগ্রপন্থীৰ লক্ষ্য থাকিব ভাৰতৰ প্রধান মন্ত্ৰী নৰেন্দ্র মোদী কিন্তু মৃত্যু হ’ব হিমন্ত বিশ্ব শর্মাৰ’।

তেওঁ প’ষ্টটোত আৰু লিখে, ‘এতিয়া হিমন্ত বিশ্ব শর্মৰ মৃত্যু মোৰ হাতৰ মুঠিত। যদি হিমন্ত বিশ্ব শর্মাৰ জীৱন ৰক্ষা কৰিব লাগে তেতিয়া হ’লে হিমন্ত বিশ্ব শর্মাই অতি শীঘ্রে নলবাৰী উপায়ুক্ত পদ অথবা নলবাৰী DC অফিচত চাকৰি দিয়ক’।

উল্লেখ্য যে এই প’ষ্টটো চমেজ উদ্দিন নামৰ এজন লোকৰ দৃষ্টিগোচৰ হোৱাত তেওঁ লিণ্টু কিশোৰ শৰ্মাৰ বিৰুদ্ধে নলবাৰী আৰক্ষী থানাত এখন এজাহাৰ দাখিল কৰিছিল। আৰু সেই এজাহাৰৰ ভিত্তিতে আজি যুৱকজনক গ্ৰেপ্তাৰ কৰা হয়।