শিৱসাগৰৰ কালুগাঁৱত অসমৰ প্ৰাচীন মুখা শিল্পক জীয়াই ৰখাৰ সংগ্ৰামত ব্যস্ত এদল কিশোৰ  

গুৰুজনাৰ অপূৰ্ব সৃষ্টি মুখা শিল্পক বিশ্ব দৰবাৰত প্ৰতিষ্ঠা কৰাৰ প্ৰয়াস কেইজনমান কিশোৰৰ।

অসমৰ এক প্ৰাচীন লোক কলা এই মুখা শিল্পৰ সৃষ্টি কৰিছিল মহাপুৰুষ শ্ৰীমন্ত শংকৰদেৱে। গুৰুজনাৰ অনুপম সৃষ্টি ভাওনাত ব্যৱহাৰ কৰা হৈছিল এই মুখা শিল্প।

সেই সময়ত শ্ৰীমন্ত শংকৰদেৱে ভাওনাত ভাগ লোৱা ভাৱৰীয়া সকলৰ বাবে নিজ হাতে তৈয়াৰ কৰিছিল বিভিন্ন চৰিত্ৰৰ মুখা।

গুৰুজনাৰ এই অপূৰ্ব সৃষ্টি মুখা শিল্পৰ প্ৰতি আকৰ্ষিত শিৱসাগৰৰ কালুগাঁৱৰ তিনিকুৰীয়াৰ এদল কিশোৰ এতিয়া ব্যস্ত ভাওনাৰ বিভিন্ন চৰিত্ৰৰ মুখা বনোৱাত।

মুখা শিল্পৰ কোনো আনুষ্ঠানিক শিক্ষা গ্ৰহণ নকৰাকৈ নিজৰ পকেটৰ ধন খৰচ কৰি এইসকল কিশোৰৰ হাতৰ পৰশত প্ৰাণ পাই উঠিছে বৰাহ, কুম্ভ, মৎস, নৰ- সিংহকে ধৰি ভাওনাৰ বিভিন্ন চৰিত্ৰৰ মুখা।

কালুগাঁৱৰ তিনিকুনীয়া যদুমণি গগৈ, ত্ৰিনয়ন জ্যোতি দত্ত,  মানস চুতীয়া, শিৱমজ্যোতি শৰ্মাকে ধৰি কেইবাজনো কিশোৰে এবছৰৰ পূৰ্বে প্ৰতিষ্ঠা কৰা গুৰু শংকৰ মুখা শিল্প সংঘই ৰাজ্যৰ বিভিন্ন প্ৰান্তৰ লগতে শিৱসাগৰৰ বিভিন্ন স্থানত ৰাস, ভাওনা আদিত মুখা শিল্প প্ৰদৰ্শন কৰি দৰ্শকৰ সমাদৰ লাভ কৰিছে।

কিশোৰ অৱস্থাতে মুখা শিল্পৰ প্ৰতি আকৃষ্ট হৈ গুৰুজনাৰ এই অপূৰ্ব সৃষ্টিক বিশ্ব দৰবাৰত প্ৰতিষ্ঠা কৰাৰ যি প্ৰয়াস কৰিছে সেই কাৰ্যক এতিয়া সকলোৱে প্ৰশংসা কৰিছে।

চৰকাৰলৈ অনুৰোধ এইসকল কিশোৰৰ। গুৰুজনাৰ অপূৰ্ব সৃষ্টিৰাজিৰ প্ৰচাৰ আৰু প্ৰসাৰৰ ক্ষেত্ৰত আমাক অলপ সহায় কৰক আমাৰ প্ৰেৰণা দিয়ক।

চৰকাৰৰ পৰা কিছু সহায় সহযোগ লাভ কৰিলে কালুগাঁৱৰ গুৰু শংকৰ মুখা শিল্প সংঘই মুখা শিল্পক বিশ্বৰ দৰবাৰত প্ৰতিষ্ঠা কৰিব পাৰিব বুলি আশাবাদী।