শিৱসাগৰত কিশোৰ সৱলীকৰণ বিষয়ক মাণ্ডলিক পৰ্য্যালোচনা সভাত কি ক’লে উপায়ুক্ত লক্ষ্মণনে?

ৰাজ্যখনৰ কিশোৰ সৱলীকৰণৰ উদ্দেশ্যে এক  প্ৰণালীবদ্ধ কাৰ্যপন্থা প্ৰস্তুত কৰাৰ লক্ষ্যৰে বৃহস্পতিবাৰে শিৱসাগৰ জিলা প্ৰশাসন আৰু জিলা শিশু আৰু কিশোৰ কোষৰ উদ্যোগত জিলা উপায়ুক্ত কাৰ্য্যালয়ৰ চুকাফা সভাকক্ষত এক পৰ্য্যালোচনা সভা অনুষ্ঠিত হয়।

সভাত অংশ গ্ৰহণ কৰি শিৱসাগৰ জিলা উপায়ুক্ত ডাঃ এছ লক্ষ্মণনে তেওঁৰ বক্তব্যত কয়, ‘’এই পৰ্য্যালোচনা সভাই কিশোৰসকলৰ বিভিন্ন সমস্যা অধ্যয়ন আৰু এইসমূহ সমাধানৰ বাবে প্ৰয়োজনীয় প্ৰণালীবদ্ধ কাৰ্যপন্থা প্ৰস্ততকৰণত গুৰুত্বপূৰ্ণ ভূমিকা পালন কৰিব।‘’

তেওঁ লগতে কয়, ‘’অসমৰ মুঠ জনসংখ্যাৰ ২১ শতাংশই কিশোৰ যাৰ বয়স ১০ ৰ পৰা ১৯ বছৰৰ ভিতৰত। প্ৰতিটো কিশোৰৰ শিক্ষা, স্বাস্থ্য, সামাজিক নিৰাপত্তা আৰু অধিকাৰ সুনিশ্চিত কৰি কিশোৰসকলৰ আত্মবিশ্বাস বৃদ্ধি কৰি সবল নাগৰিক হিচাপে গঢ় দিব পাৰিলেহে দেশৰ উন্নয়ন প্ৰকৃতাৰ্থত সম্ভৱপৰ হ’ব।‘’

আনহাতে, অতিৰিক্ত উপায়ুক্ত জোনমনি সোনোৱালে সমাজত কিশোৰ সকলে সন্মুখীন হোৱা বিভিন্ন সমস্যা যেনে লিংগ বৈষম্য, শিক্ষাৰ সুযোগৰ পৰা বঞ্চিত হোৱা, স্বাস্থ্যজনিত সমস্যা, বাল্য বিবাহ, মানৱ সৰবৰাহ, কম বয়সতে শ্রমত নিয়োজন আদিৰ বিষয়ে উল্লেখ কৰে।

পৰ্য্যালোচনা সভাত সংশ্লিষ্ট বিভাগসমূহৰ সহযোগ আৰু পৰামৰ্শই এইসমূহৰ সমস্যাৰ পৰা  কিশোৰসকলক নিৰাপত্তা প্ৰদানৰ দিশত কাৰ্য্যকৰী ব্যৱস্থা গ্ৰহণত সহায়ক হ’ব বুলিও সোণোৱালে ব্যক্ত কৰে।