মহৰ্ষি তুহিন কাশ্যপৰ অসমীয়া চুটি ছবি মোৰ ঘোঁৰাৰ দূৰন্ত গতি –দ্য হৰ্চ ফ্ৰম হেভেন-এ শ্ৰেষ্ঠ লাইভ একচন চুটি চলচ্চিত্ৰ শ্ৰেণীত অস্কাৰ ২০২২ ৰ দৌৰত প্ৰৱেশ কৰিছে।
লোককাহিনীৰ (ওজা পালি) সৈতে এক বিশেষ সংমিশ্ৰণ কৰি নিৰ্মাণ কৰা চলচ্চিত্ৰখনে বিশ্বাসৰ শক্তি আৰু ই কেনেদৰে মানুহৰ উৎসাহক প্ৰবাহিত শীৰ্ষতম স্থানলৈ লৈ যাব পাৰে সেয়া দেখুওৱা হৈছে।
অস্কাৰলৈ তেওঁৰ ছবি বিবেচিত হোৱাৰ পিছতে মহৰ্ষি তুহিন কাশ্যপে কয়” এয়া এটা সপোনৰ দৰে অনুভৱ হৈছে। যদিও মই নাভাবো যে এটা পুৰস্কাৰে কেতিয়াও কোনো ‘কলা’ বা ‘অ-কলা’ৰ বৈধতা প্ৰদান কৰিব পাৰে, তথাপিও অস্কাৰ মোৰ বাবে এতিয়াও এক সপোন। মই অষ্টম শ্ৰেণীত অধ্যয়ন কৰি থকাৰে পৰাই চলচ্চিত্ৰ নিৰ্মাতা হ’ব হোৱাৰ আশা মনতে পুহি ৰাখিছিলো” ।
ছবি খনত এটা গাধক লৈ কাহিনী ৰচনা কৰা হৈছে। ঈশ্বৰীয় সত্তাৰ গাধটোকলৈ চাৰিওফালৰ লোকসকলৰ মাজত হোৱাআলোচনাই চুবুৰীয়া সকলো লোককে গাধটো পাবলৈ উদগ্ৰীব কৰি তোলে। চুটি চলচ্চিত্ৰখনক মুখ্য চৰিত্ৰত অভিনয় কৰিছে প্ৰখ্যাত অভিনেতা অতুল পাচনীয়ে । ছবিখনে শেহতীয়াকৈ ভাৰতীয় প্ৰতিযোগিতা শাখাত বাংগালুৰু আন্তঃৰাষ্ট্ৰীয় চুটি চলচ্চিত্ৰ মহোৎসৱ ২০২২ ত শীৰ্ষ পুৰস্কাৰ লাভ কৰিছে৷
ইয়াৰ পূৰ্বে, ছবিখন মেক্সিকো চিটিৰ টি চিনেটেকা নাচিওনেল মিউজিয়াম আৰু কলকাতা আন্তঃৰাষ্ট্ৰীয় চলচ্চিত্ৰ মহোৎসৱত প্ৰদৰ্শিত হৈছিল৷ চলচ্চিত্ৰ নিৰ্মাতা কাশ্যপে কলকাতাৰ সত্যজিৎ ৰায় ফিল্ম এণ্ড টেলিভিছন ইনষ্টিটিউট (এছআৰএফটিআই)ৰ পৰা পৰিচালনা আৰু চিত্ৰনাট্য ৰচনাত স্নাতকোত্তৰ পাঠ্যক্ৰম সম্পূৰ্ণ কৰিছে৷
তেওঁ দুখন ফিচাৰ ছবি বৰষুণ-চংছ অফ ৰেইন (২০২১) আৰু বুলু ফিল্ম (২০২২)ৰ চিত্ৰনাট্য লিখিছে৷ তেওঁ আন এখন চুটি চলচ্চিত্ৰ- পোয়েট্ৰি অফ হুইচপাৰচ (২০১৯) আৰু এখন তথ্যচিত্ৰ ৱাটাৰ ৱাটাৰ এভাৰৱেৰ (২০২০) পৰিচালনা কৰিছে।
