শেহতীয়াকৈ বিভিন্ন আজৱ ঘটনাৰ বাবে চৰ্চিত হৈ থকা দিল্লী মেট্ৰ’ত এইবাৰ সংঘটিত হৈছে এক চৰম ঘৃণনীয় কাণ্ড। চলন্ত মেট্ৰ’ত এক ব্যক্তিৰ চূড়ান্ত বিকৃত যৌন নিৰ্যাতনৰ বলি হৈছে এগৰাকী নাবালিকা।
প্ৰকাশিত খবৰ অনুসৰি, দিল্লী মেট্ৰ’ ৰে’লত যাত্ৰা কৰি থকা এগৰাকী ব্যক্তিয়ে হস্তমৈথুন কৰি এগৰাকী নাবালিকাৰ ওপৰত বীৰ্য্যপাত কৰে। বুধবাৰে নিশা প্ৰায় ৮:৩০ বজাত দিল্লী মেট্ৰ’ৰ ‘ৰেড লাইন’ত সংঘটিত হৈছে।
কালি দেশজুৰি পৰম সন্মান আৰু শ্ৰদ্ধাৰে ৰাখী বন্ধন উদযাপন কৰাৰ সময়তে সংঘটিত হৈছে এনে ঘৃণনীয় কাণ্ড। ৰে’লখনত যাত্ৰীৰ যথেষ্ট সমাগমৰ সুবিধা লৈ এনে চৰম বিকৃত যৌন কামনা চৰিতাৰ্থ কৰে ব্যক্তিগৰাকীয়ে।
ইফালে নাবালিকাগৰাকীৰ মাতৃও সেইসময়ত উক্ত স্থানতে আছিল আৰু তেওঁৰ সন্তানৰ ওপৰত এইদৰে ব্যক্তিগৰাকীয়ে বীৰ্য্যপাত কৰা সমগ্ৰ ঘটনা প্ৰত্যক্ষ কৰে। ঘটনাৰ পিছত তেওঁ তৎক্ষণাৎ চিলামপুৰ মেট্ৰ’ ষ্টেচনত ৰে’লৰ পৰা নামি দিয়ে।
অৱশ্যে উক্ত ডবাত যাত্ৰা কৰা দুগৰাকী ব্যক্তিয়ে এই কাণ্ড প্ৰত্যক্ষ কৰে আৰু অভিযুক্ত ব্যক্তিগৰাকীক কৰায়ত্ব কৰি পিছত তেওঁক শ্বাহদাৰা ষ্টেচনৰ দিল্লী মেট্ৰ’ কৰ্তৃপক্ষৰ হাতত গতাই দিয়ে।
ষ্টেচন কৰ্তৃপক্ষই পিছত ঘটনাৰ বিষয়ে আৰক্ষীক অৱগত কৰে। ঘটনা সন্দৰ্ভত বিস্তৃতভাৱে পিছত সদৰী কৰা হ’ব বুলি কৰ্তৃপক্ষই লগতে উল্লেখ কৰিছে।
