মঙলদৈৰ ৮ নং ৱাৰ্ডত থকা ফ্লিপকাৰ্ট অনলাইন শ্বপিঙৰ বিতৰণ কেন্দ্ৰত সংঘটিত চুৰি কাণ্ডৰ সৈতে জড়িত থকাৰ সন্দেহত মঙলদৈ আৰক্ষীয়ে মঙলবাৰে আন এগৰাকী লোকক গ্ৰেপ্তাৰ কৰে।
গ্ৰেপ্তাৰ কৰা লোক জনৰ পৰা আৰক্ষীয়ে ২,৬৮,৫০০ টকা নগদ ধন জব্দ কৰে। গ্ৰেপ্তাৰ হোৱা লোকজন খৈৰাবাৰী আৰক্ষী চকীৰ অন্তৰ্গত কুহিয়াৰকুছি গাঁৱৰ গাঁওবুঢ়া ডন চন্দ্ৰ ৰামচিয়াৰী বুলি জানিব পৰা গৈছে।
মঙলদৈ সদৰ আৰক্ষী থানাৰ আৰক্ষী পৰিদৰ্শক নিৰঞ্জন বৰুৱাই জনোৱা মতে গাঁওবুঢ়া ডন চন্দ্ৰ ৰামচিয়াৰীয়ে টকাখিনি ঘৰৰ নলা এটাত লুকুৱাই ৰাখিছিল।
মঙলবাৰে উদ্ধাৰ হোৱা টকাখিনিৰ সৈতে সমগ্ৰ ঘটনাটোত বৰ্তমানলৈ মুঠ ৭,১৮,৫০০ টকা উদ্ধাৰ হৈছে।
ইয়াৰপূৰ্বে, বৃহস্পতিবাৰে নিশা আৰক্ষীয়ে চেনীপাৰৰ সঞ্জীৱ ভূঞা আৰু ১ নং বেজপাৰা গাঁৱৰ জয়ন্ত ঘাটোৱাল নামৰ দুগৰাকী কৰ্মচাৰীক ঘটনা সংক্ৰান্তত গ্ৰেপ্তাৰ কৰি ৪.৫০ লাখ টকা উদ্ধাৰ কৰিবলৈ সক্ষম হৈছিল।
আনহাতে, এতিয়াও আৰক্ষীয়ে চুৰি হোৱা মুঠ ২১.৫৯ লাখ টকাৰ ১৪.৪০ লাখ টকা উদ্ধাৰ কৰিবলৈ বাকী আছে।
চুৰি কাণ্ডৰ মাষ্টাৰ মাইণ্ড যোগেশ ডেকাকে ধৰি প্ৰতিষ্ঠানটোত কৰ্মৰত আন তিনিগৰাকী অভিযু্ক্ত এতিয়াও পলাটক অৱস্থাত আছে বুলি বৰুৱাই জানিবলৈ দিয়ে।
ইতিমধ্যে আৰক্ষীয়ে ৭ অক্টোবৰত দুৰ্গা পূজাৰ সময়ত সংঘটিত হোৱা চুৰি কাণ্ডৰ ঘটনা সন্দৰ্ভত মঙলদৈ আৰক্ষী থানাত ৮৩৬/২০১৯ য়ু/এছ ৪৫৭/৩৮০ নম্বৰত এটা গোচৰ ৰুজু কৰিছে।
