মণিপুৰৰ মুখ্য মন্ত্রী এন বীৰেন সিঙে বৃহস্পতিবাৰে ৰাজ্যখনৰ এগৰাকী মহান সেৱিকা মহিলা অটোচালকক পুৰস্কৃত কৰে।
পানগেইৰ এগৰাকী মহিলা অটোচালক লাইবি ঐনামে ইয়াৰ হাস্পাতলৰ পৰা এজনী ছোৱালীক কোভিড-১৯ৰ পৰা সুস্থ হৈ উঠাৰ পাছত কামজং জিলাত থকা তাইৰ ঘৰলৈ কঢ়িয়াই নি থৈ আহিছিল।
‘’পানগেইৰ এগৰাকী অটো চালক শ্ৰীমতী লাইবি ঐনামক ১,১০,০০০টকাৰ নগদ পুৰস্কাৰ দিবলৈ পাই আনন্দিত হৈছো, যিয়ে জৱাহৰলাল নেহৰু ইনষ্টিটিউট অফ মেডিকেল ছায়েন্সৰ পৰা সুস্থ হৈ উঠা ছোৱালীজনীক কামজঙলৈ ৮ঘন্টা জোৰা যাত্ৰাৰে যোৱা ৩১ মে’ৰ মাজনিশা ঘৰত থৈ আহিছিল। তেওঁ সঁচাকৈয়ে এই সেৱাৰে এক জলন্ত দৃষ্টান্ত দাঙি ধৰিছে,’’-মুখ্য মন্ত্ৰীগৰাকীয়ে টুইটত লিখিছে।
Glad to honour and hand over a cash reward of Rs.1,10,000 to Smt Laibi Oinam, a auto driver from Pangei who took the trouble to take the discharged girl from JNIMS covering 8 hours journey to Kamjong on midnight of May 31. She truly exemplifies hard work and “service above self.” pic.twitter.com/oFwgcx0Kyz
— N. Biren Singh (@NBirenSingh) June 11, 2020
এই বঁটাটো মণিপুৰৰ কেইগৰাকীমান ব্যৱসায়ীৰ লগতে আমেৰিকা যুক্তৰাষ্ট্ৰ, ব্ৰিটেইন, কানাডা আৰু ছিংগাপুৰত থকা প্ৰবাসী মণিপুৰীয়ে স্পনছৰ কৰিছে।
দুটি সন্তানেৰে সৈতে পৰিয়ালৰ মূল উপাৰ্জনকাৰী হৈছে লাইবি।
উল্লেখযোগ্য যে তেওঁৰ জীৱনক লৈ নিৰ্মিত অটোচালক শীৰ্ষক তথ্যচিত্ৰখনে ৬৩সংখ্যক ৰাষ্ট্ৰীয় চলচ্চিত্ৰ বঁটা ২০১৫’ত অ-কাহিনী শাখাত শ্ৰেষ্ঠ সামাজিক বিষয়ক ছবি আৰু ২০১৭বৰ্ষৰ উইমেনছ ভইচেছ নাও ফিল্ম ফেষ্টিভেলত দৰ্শকৰ পছন্দ শাখাত শ্ৰেষ্ঠ তথ্যচিত্ৰকে ধৰি বহু প্ৰশংসা অৰ্জন কৰিছে।
